Azərbaycan, Bakı, 29 oktyabr/ Trend , müxbir N.Abdullayeva/ Kuba hökuməti Azərbaycan ilə ikitərəfli iqtisadi əməkdaşlığın inkişafında maraqlıdır.
Kubanın Azərbaycandakı səfiri Marselo Tores çərşənbə günü Trend -a bildirib ki, əməkdaşlıq perspektivləri dekabrın birinci dekadasında Kuba nümayəndə heyətinin səfəri zamanı müzakirə olunacaq. Kubanın hökumət üzvlərindən ibarət nümayəndə heyətinə dövlət naziri Rikardo Kabrisasa rəhbərlik edəcək.
Tores bildirib ki, Bakıda Azərbaycan və Kuba arasında iqtisadi əməkdaşlıq üzrə hökumətlərarası komissiyanın II iclası keçiriləcək.
Ölkələr arasında iqtisadi münasibətlər ötən ildən etibarən yeni mərhələyə qədəm qoyub. 2007-ci ilin sonunda Havanada iqtisadi əməkdaşlıq üzrə Azərbaycan-Kuba hökumətlərarası komissiyasının ilk iclası keçirilib. İclasda Azərbaycan və Kuba arasında hazırkı iqtisadi əlaqələrin vəziyyəti və onların inkişaf perspektivləri müzakirə olunub.
Səfər çərçivəsində mədəniyyət, ticarət, idman, turizm və energetika sahələrində təqribən on müqavilə layihəsi nəzərdən keçiriləcək.
Azərbaycanın rəsmi statistikasına görə, 2008-ci ilin birinci yarısında ölkələr arasında xarici ticarət dövriyyəsi ixrac həcmi sıfır olmaqla 8,3 min dollar təşkil edib. Lakin yalnız iyul ərzində mal dövriyyəsi Azərbaycan mallarının ixracı hesabına 156 min dollar təşkil edib.
Məqalə müəllifi ilə əlaqə ünvanı - trend
