Azərbaycan, Bakı, 04 noyabr / Trend , müxbir A.Hüseynbala / Azərbaycanda dövlət qeydiyyatına alınmayan qeyri-hökumət təşkilatlarına müxtəlif istiqamətlərdə yardım göstəriləcək.
"Bu yardım ilk növbədə maliyyə ilə bağlı olacaq. Onların qeydiyyat problemlərini həll etməyə, hökumətlə münasibətlərinin qurulmasına da çalışacağıq", - çərşənbə axşamı Trend -a Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev bildirib.
Trend -ın arayışı: Azərbaycan prezidenti İlham Əliyev aprelin 16-da Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası üzvlərinin təyin edilməsi haqqında Sərəncam imzalayıb.
Azərbaycan Respublikası Prezidentinin 2007-ci il 13 dekabr tarixli Fərmanı ilə təsdiq edilmiş "Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası haqqında Əsasnamə"yə uyğun olaraq, 11 nəfərdən ibarət tərkibdə fəaliyyət göstərəcək Şura üzvlərindən 3-ü dövlət orqanlarının nümayəndələrindən, 8-i isə Qeyri-Hökumət Təşkilatlarının irəli sürdüyü namizədlərdən təyin edilib.
Milli QHT Forumunun keçmiş prezidenti Azay Quliyev aprelin 21-də Prezident yanında Qeyri-Hökumət Təşkilatlarına Dövlət Dəstəyi Şurasının sədri seçilib.
Şura sədrinin müavini vəzifələrinə isə Prezidentin İcra Aparatının İctimai-siyasi məsələlər şöbəsinin ictimai-siyasi təşkilatlarla iş sektorunun müdiri Tahir Süleymanov və Maliyyə Nazirliyinin Sosial sahələrin maliyyəsi şöbəsi müdirinin müavini Vüqar Məcidli seçilib.
Şura sədrinin sözlərinə görə, 2009-cu ildəki maliyyə müsabiqəsində regionlarla bağlı qeyri-hökumət təşkilatlarına ayrıca məbləğin ayrılması nəzərdə tutulur: "Ona görə ki, regionlardakılarla Bakıda fəaliyyət göstərən QHT-lər eyni şəraitdə müsabiqəyə qatılsalar da, imkanları bərabər olmadığından çox zaman qalib ola bilmirlər", - Quliyev deyib.
Quliyev Azərbaycanla bağlı xarici ölkələrdə fəaliyyət göstərən təşkilatlara yardım məsələsinin də həll olunacağını qeyd edib: "Bizim hazırladığımız təkliflərdə Şuranın Azərbaycandan kənarda qeydiyyatdan keçən təşkilatları maliyyəşdirməsi nəzərdə tutulur. Təklifimiz qəbul olunarsa, biz Azərbaycan həqiqətlərini təbliğ edən xarici vətəndaşların yaratdığı təşkilatları da maliyyələşdirməyi istisna etmirik", - Şura sədri vurğulayıb.
Trend -un arayışı: Azərbaycanda iki mindən artıq QHT var. Bu il layihələrə görə QHT-lərə ayrılan maliyyə yardımının minimum məbləği iki, maksimum məbləği isə 12 min manatdır.
Məqalə müəllifi ilə əlaqə ünvanı: [email protected]
