Azərbaycan, Bakı, 31 yanvar/ Trend , müxbir A.Qasımova/ Ermənistanda baş verən mart hadisələrində müqəssir olan şəxsləri məsuliyyətə cəlb etmək lazımdır. Bu barədə Trend -a cümə günü Avropa Şurasının insan haqları üzrə komissarı Tomas Hammerberq bildirib.
"Mən iyul səfərimdən sonra müşahidələrimi ötən ilin sentyabrında səsləndirdim - mart hadisələrində müqəssir olan şəxslərin məsuliyyətə cəlb edilməsinə və tutulan şəxslər üçün qənaətbəxş qərarın qəbul edilməsi zəruridir ", - deyə komissar bildirib.
Serj Sərkisyanın qalib gəldiyi 2008-ci il prezident seçkilərinin nəticələrinidən razı qalmayan Ermənistan müxalifətinin etiraz aksiyası martın 1-də mitinqçilərlə qanun keşikçiləri arasında toqquşma ilə nəticələndi. Nəticədə, on nəfər həlak oldu, 265 nəfər yaralandı.
Komissarın sözlərinə görə, hakimiyyət tədqiqat üzrə ekspert qrupunun yaradılmasına səy göstərir. Bu qurpun vəzifəsi ətraflı, müstəqil, qərəzsiz və açıq araşdırma aparmaqdan ibarətdir və tədqiqatların nəticələri bütün Ermənistan əhalisi tərəfindən etibarlı qəbul olunmalıdır.
"AŞ PA bundan sonra da hadisələrin gələcək inkişafını, xüsusilə də, ötən ilin martında Yerevanda baş verən hadisələrlə bağlı azadlıqdan məhrum edilmiş şəxslərin problemlərini diqqətlə izləyəcək", - deyə Hammerberq əlavə edib.
