Azərbaycan, Bakı, 13 fevral / Trend , müxbir Ü.Sadıqova/ Hakim "Likud" partiyasının rəhbərliyi altında Knessetin yeni tərkibinin formalaşdırılması Fələstin-İsrail sülh prosesinə mənfi təsir göstərəcək, buna görə Avropa İttifaqı (Aİ) fələstinlilər ilə danışıqlarda gələcək İsrail hökumətinin qarşısına şərt qoymalıdır. Bu barədə Trend -a Fələstinin Aİ-dəki nümayəndə heyəti rəhbərinin müavini Adil Ətiyə bildirib.
" "Likud" hökumətə rəhbərlik edərsə, bu iki dövlətin (İsrail və Fələstin) mövcud olma məsələsinin həllinin məhvinə gətirib çıxaracaq. Fələstinlilər Aİ-dən gələcək İsrail hökumətinə qarşı, onun sülh prosesinin şərtlərinə hörmət etməyəcəyi təqdirdə tədbirlər görməyi tələb edir", - deyə Brüsseldən telefonla Ətiyə bildirib.
İsraildə parlament seçkiləri başa çatdıqdan sonra lider partiyalar - "Kadima" və "Likud" qarşısında koalisiyanın yaradılması ilə bağlı çətin danışıqlar durur. Benyamin Netanyaxunun rəhbərlik etdiyi "Likud" partiyasının Tsipi Livninin partiyasından bir səs ilə geri qalmasına baxmayaraq, İsraildə əmindirlər ki, yeni hökumətdə əksəriyyəti, Aviqdor Libermanın rəhbərlik etdiyi və 15 yer alan "Bizim evimiz - İsrail" və bir sıra digər kiçik partiyalar ilə "Likud" koalisiyası ələ alacaq.
Netanyaxu və Liberman İsrail ilə Fələstin administrasiyası arasında sülh prosesinin dayandırılması mövqeyindən çıxış edirlər. Hər iki partiya "Kadima"nın Qəzzə Zolağında HƏMAS hərəkatı üzvlərinə qarşı hərbi əməliyyatların dayandırmasını kəskin tənqid ediblər.
Netanyaxu seçkiqabağı kampaniya zamanı bildirib ki, HƏMAS-ı tamamilə məhv etmək lazımdır və hər hansı bir danışıqdan söhbət belə gedə bilməz.
İsrail yanvarın 18-də qoşunlarını Qəzzədən çıxarıb və HƏMAS-ın infrastrukturlarına 22 gün davam edən hava və quru hücumlardan sonra birtərəfli qaydada atəşkəs elan edib. "Ərimiş qurğuşun" əməliyyatları 1300 nəfərin həyatına son qoyub və 5500-dən artıq insan yaralanıb.
Fələstin administrasiyasının rəhbəri Mahmud Abbas bildirib ki, fələstinlilər İsrailin istənilən hökuməti ilə danışıqlar aparmağa hazırdırlar.
Fələstinli diplomat Ətiyənin bildirdiyinə görə, Fələstin tərəfi başa düşür ki, İsrail hökuməti sağçıların rəhbərliyi altında sülh prosesini dayandıracaq. O əlavə edib ki, buna görə, Aİ Fələstində milli hökumət formalaşan zaman fələstinlilərə qarşı olduğu kimi İsrailə qarşı da şərtlər irəli sürməlidir.
2005-ci ildə Aİ HƏMAS nümayəndələrinin də daxil olduğu yenicə formalaşmış milli Fələstin hökumətinə qarşı üç şərt irəli sürmüşdü.: İsraliin mövcudluğunu tanımaq, danışıqları davam etdirmək və əvvəllər Fələstin Azadlıq Təşkilatı ilə İsrail arasında imzalanan bütün sənədləri tanımaq.
"Hazırda biz Aİ-nin analoji tələbləri gələcək hökumətin sülh prosesinə hörmət etməyəcəyi təqdirdə İsrailə qarşı da irəli sürməsini tələb edirik", - deyə Brüsseldən telefonla Ətiyə bildirib.
2007-ci ildə Annapolisdə keçirilən konfransda qəbul olunan Fələstin-İsrail münaqişəsinin həlli üzrə əsas şərtlərə Qərb sahilində yəhudi məskənlərinin tikintisinin dayandırılması və müstəqil Fələstin hökumətinin yaradılması üçün şəraitin formalaşdırılması daxildir.
Aİ İsraildə keçirilən seçkilərin nəticələri ilə bağlı hələ ki, heç bir bəyanat verməyib.
Qəzzədə silahlı münaqişənin başa çatmasından sonra Aİ-nin Fələstin Administarsiyası və İsrailə qarşı əsas tələbləri hökumət dəyişikliklərindən asılı olmayaraq danışıqların davam etdirilməsi yolu ilə sülh prosesində irəliləyişə nail olmaq olub.
Fələstinli diplomat Ətiyə bildirib ki, İsrailin sağ bloku hökumətə rəhbərlik edərsə, Aİ-nin İsrail ilə apardığı əməkdaşlığın genişləndirilməsi barədə danışıqlar dayandırılacaq, çünki, avropalılar sülhün şərtlərinə hörmət etməyənlərlə əməkdaşlıq etməyəcək.
"Aİ-nin mövqeyi hələ məlum deyil, lakin biz ümid edirik ki, avropalılar fələstinlilərin hüquqlarına hörmətlə yanaşmayan gələcək İsrail hökumətinə (sağ blok) qarşı tədbirlər görəcəklər", - deyə o əlavə edib.
