Azərbaycan, Bərdə, 25 fevral / Trend , müxbir Ş.Cəliloğlu / Azərbaycanın cənub qərbində yerləşən Tərtərdə partlamamış hərbi sursat tapılıb.
Trend -un bölgə müxbirinin məlumatına görə, çərşənbə günü rayonun Elman Hüseynov prospektində tikinti üçün qazıntı işləri aparılarkən 2 metr dərinlikdə partlamamış PQ-9 markalı raket üçün qranatamyot mərmisi aşkarlanıb.
Azərbaycan Ərazilərinin Minalardan Təmizlənməsi üzrə Milli Agentliyin əməkdaşları mərminin zərərsizləşdirilməsi üçün tədbirlər görür.
Mərminin Qarabağ müharibəsi dövründə həmin əraziyə atıldığı ehtimal olunur.
Trend -un arayışı: Ötən ay Azərbaycanda üç mina partlayışı hadisəsi qeydə alınıb.
Azərbaycan Ərazilərinin Minalardan Təmizlənməsi üzrə Milli Agentliyin mətbuat xidmətinin məlumatına görə, hadisələr zamanı 5 nəfər müxtəlif dərəcəli bədən xəsarətləri alıb.
Müxtəlif mənbələrə istinadən aparılan statistikaya görə, 2001-ci ilin sentyabrından 108 mina partlayışı nəticəsində 61 nəfər həlak olub, 143 nəfər müxtəlif dərəcəli xəsarət alıb.
Ötən ay 685 261 kvadrat metr ərazi yoxlanılıb, mina və partlamamış hərbi sursatdan (PHS) təmizlənib. 6 902 PHS və mina aşkar edilərək zərərsizləşdirilib.
İndiyədək cəmi 79 386 078 kvadrat metr ərazi təmizlənib, 378 524 mina və PHS zərərsizləşdirilib.
Agentlik tərəfindən təmizləmə əməliyyatları Tərtər, Ağdam, Füzuli, Göygöl və Ağstafa rayonlarında aparılır.
Məqalə müəllifi ilə əlaqə ünvanı: [email protected]