Azərbaycan, Bаkı, 01 aprel / Trend , müxbir A.Hüseynbala /
Azərbaycanın müxalif partiyası siyasi partiyaların dövlət büdcəsindən maliyyələşdirilməsinin zəruriliyi haqda fikirləri müdafiə edir.
"Bu təşəbbüsün reallaşması nəinki iqtidar-müxalifət münasibətlərinə, ümumiyyətlə ölkənin siyasi sisteminin inkişafına böyük töhfə verəcək", - çərşənbə günü Trend -a Ədalət Partiyasının sədr müavini Elxan Şükürlü bildirb.
Şükürlünün sözlərinə görə, partiya Prezident Administrasiyasının rəhbəri Ramiz Mehdiyevin fikirlərini hakimiyyətin ölkədə yeni siyasi münasibətlər qurmaq istəyi kimi qiymətləndirir. "Təəssüf edirik ki, bəzi müxalifət təmsilçiləri burada başqa məna axtarmağa başlayıblar. Ancaq biz düşünürük ki, cənab Mehdiyev səviyyəsində siyasi partiyaların büdcədən maliyyələşməsi məsələsinin gündəliyə gətirilməsi əslində, iqtidar-müxalifət dialoqu, siyasi qüvvələr arasında barış mühitinin yaranması üçün də əlverişli zəmindir", - müxalifyönlü partiya funksioneri əlavə edib.
Ədalət Partiyasının sədr müavininin fikrincə, faktiki olaraq, Mehdiyev səsləndirdiyi fikirlərlə, eləcə də son bir neçə ay ərzində yazdığı fundamental məqalələrlə bütün siyasi qüvvələri Azərbaycanın gələcəyi ilə bağlı elmi-nəzəri diskussiyaya, polemikaya dəvət edib.
Məqalə müəllifi ilə əlaqə ünvanı:[email protected]
