ABŞ, Vaşinqton, 13 iyun / Trend , xüsusi müxbir N.Boqdanova /
Trend -un Türkiyənin xarici işlər naziri Əhməd Davudoğlu ilə eksklüziv müsahibəsi
- Öz bəyanatlarınızda siz həmişə qeyd edirsiniz ki, Türkiyə və Ermənistan arasında münasibətlər Azərbaycan-Ermənistan qarşılıqlı münasibətləri ilə paralel prosesdir. Öz növbəsində Ermənistan bildirir ki, Türkiyə ilə dialoq zamanı Qarabağı müzakirə obyektinə çevirmir. Bunu necə başa düşmək olar?
- Bizim bu məsələ ilə bağlı siyasətimiz açıq və aydındır. Ermənistanla dialoqda biz onun da Qafqazda sülh və inkişaf istədiyini görürük. Buna görə də biz, qonşularımızla yaxşı münasibətlər qurulması istiqamətində apardığımız siyasət çərçivəsində ikitərəfli əlaqələri daha çox normallaşdırmaq istəyirik. Ancaq Cənubi Qafqazdakı durumun normallaşdırılması üçün Dağlıq Qarabağ münaqişəsinin həllində irəliləyiş və inkişafa nail olmaq lazım və vacibdir. Biz hesab edirik ki, bütün tərəflər bu planları realizə etmək üçün çalışmalıdır. Mən həmçinin qeyd etmək istəyirəm ki, Türkiyə ilə Ermənistanın qarşılıqlı münasibətləri Cənubi Qafqazla məhdudlaşmır, həmçinin Türkiyə-Amerika münasibətlərinə də təsir edir. Bu düzgün deyil - bizim Ermənistanla münasibətlərimiz ABŞ-la əlaqələrimizə təsir etməməlidir.
- Belə təsəvvür yaranır ki, Rəcəb Tayyib Ərdoğanın Azərbaycana səfərindən sonra "yol xəritəsi" planı üzrə danışqılar artıq aktual deyil. Bu belədirmi?
- Xeyr, bu belə deyil. Biz Ermənistanla danışıqlarda yetərincə qəti fikirliyik. Bizim - Türkiyə, Ermənistan, Azərbaycan, hətta Rusiya və Gürcüstanın birgə gələcəyimiz var. Biz bir regiondayıq və həmişə də belə olacaq. Buna görə də biz konstruktiv və bizim danışıqlara mane olan proses və hadisələrdən mümkün qədər uzaq olmalıyıq.
- BMT Təhlükəsizlik Şurasında sədrlik mandatı Türkiyəyə keçib. Sizin əsas qovluğunuzda Qarabağ mövzusu da varmı?
- Əlbəttə var, necə olmaya bilər? Bizim Nyu-Yorkdakı birinci görüşümüz sırf simvolik xarakter daşıyırdı, çünki Türkiyə həmin zaman BMT Təhlükəsizlik Şurasının sədrlik mandatını yenicə əldə etmişdi. Bu ay TŞ-nin gündəliyində müxtəlif məsələlər müzakirə ediləcək və Türkiyə Qarabağ mövzusu da daxil olmaqla, beynəlxalq maraq və aktuallıq kəsb edən bütün məsələlərin müzakirəsinin tərəfdarıdır. Amma biz istərdik ki, Ermənistan-Azərbaycan danışıqları məhsuldar olsun. Biz həmçinin bu məsələ üzərində ATƏT-in Minsk Qrupu çərçivəsində də çalışırıq. Vaşinqtona səfərim zamanı ABŞ rəhbərliyi ilə bu məsələni müzakirə etdik və belə nəticəyə gəldik ki, bizim ümumi məqsədimiz bu münaqişənin həllinə birlikdə maksimum yardım etməkdir.
Məqalə müəllifi ilə əlaqə ünvanı: адресу [email protected]
