Azərbaycan, Bakı, 10 avqust / Trend , müxbir C.Babayeva /
Trend Azərbaycanın müxalifət partiyalarının beynəlxalq əməkdaşlıq səviyyəsini müəyyən etmək üçün sorğu keçirib. Sorğunun nəticəsinə əsasən, müxalifət partiyalarının beynəlxalq əməkdaşlıq səviyyəsi fərqlidir.
Azərbaycan Demokrat Partiyasının (ADP) beynəlxalq əməkdaşlığı yoxdur.
"Ardıcıl olaraq heç bir xarici dövlətin siyasi partiyaları ilə əməkdaşlıq etmirik. Bəzi Avropa ölkələrinin siyasi partiyaları ilə əməkdaşlığın qurulması üçün cəhdlər etsək də, nəticə əldə olunmayıb", - bazar ertəsi Trend -a ADP sədri Sərdar Cəlaloğlu bildirib.
Müsavat Partiyasının bir sıra Avropa ölkələri, Türkiyə, Ukrayna və Gürcüstanın bəzi siyasi partiyaları ilə əmkdaşlığı var. "Partiya Avropada çox məşhur olan və bir sıra ölkələrdə hakimiyyətdə nümayəndələri olan və hakimiyyətdə olan, Avropa Parlamentində üçüncü yerdə olan Liberal Demokrat İttifaqının üzvüdür. İttifaqa daxil olan 30-dan artıq Avropa ölkəsinin partiyaları ilə əməkdaşlığımız var. Bundan başqa Türkiyə, Ukrayna və Gürcüstanın bəzi siyasi partiyaları ilə sıx əlaqələrimiz var", - bazar ertəsi Trend -a Müsavat Partiyasının Mərkəzi İcra Aparatının rəhbəri Arif Hacılı bildirib.
Hacılının sözlərinə görə, Müsavat Partiyasının beynəlxalq əməkdaşlığının səviyyəsi arzuolunan səviyyədə deyil. "Biz İttifaqın bir sıra tədbirlərində maliyyə çətinliyinə görə iştirak edə bilmirik. Bu problemə görə, eyni zamanda Türkiyə, Gürcüstan və Ukraynadan olan tərəfdaşlarımızı Azərbaycana dəvət edə bilmirik. Lakin qarşılıqlı münasibətlərin qorunub saxlanması üçün vaxtaşırı tədbirlər həyata keçiririk", - Hacılı deyib.
Azərbaycan Sosial Demokrat Partiyasının (ASDP) beynəlxalq əməkdaşlığı yüksək səviyyədədir.
"Dünyanın 270 ölkəsinin siyasi partiyalarının təmsil olunduğu Beynəlxalq Sosialist İnternasional Təşkilatının üzvüyük. Əməkdaşlığımız arzuolunan və çox sıxdır", - bazar ertəsi Trend -a ASDP həmsədri Araz Əlizadə bildirib.
Azərbaycan Milli İstiqlal Partiyasında (AMİP) hesab edirlər ki, partiya ölkədə beynəlxalq əməkdaşlığı ən yüksək səviyyədə olan siyasi təşkilatdır. "Partiya 1997-ci ildən dünyanın 63 ölkəsinin 80 partiyasının təmsil olunduğu Beynəlxalq Demokrat İttifaqın üzvüdür. Partiya həmçinin İsveçin hakim Moderat, Avropa Xalq Partiyası, ABŞ-ın Respublikaçılar Partiyası, Kanadada fəaliyyət göstərən Güney Azərbaycan İstiqlal Partiyası ilə sıx əməkdaşlıq edir", - bazar ertəsi Trend -a AMİP-in mətbuat və təbliğat katibi Əli Orucov bildirib.
Orucovun sözlərinə görə, partiyanın beynəlxalq əməkdaşlığının indiki səviyyəsi qaneedicidir. "Daha geniş beynəlxalq əməkdaşlığa nail olmaq üçün çalışırıq", - o deyib.
Trend -un arayışı: "Siyasi partiyalar haqqında" yeni qanun layihəsi payız sessiyasında Milli Məclisə təqdim ediləcək. Yeni qanunda siyasi partiyaların qeydiyyatı, maliyyələşdirilməsi, fəaliyyəti, seçkilərdə iştirakı, cəmiyyətdəki rolu, beynəlxalq əməkdaşlığı və digər məsələlərin əks olunması nəzərdə tutulur.
Məqalə müəllifi ilə əlaqə ünvanı: [email protected]