Azərbaycan, Bakı, 09 sentyabr / Trend , müxbir A.Hüseynbala /
Azərbaycanın bir neçə müxalifət partiyasının yaratdığı hərəkat bələdiyyə seçkilərində iştirakla bağlı xüsusi qərar qəbul edib.
"Biz seçkilərdə bir siyasi blokun nəzdində müxtəlif seçki blokları şəklində iştirak edəcəyik", - çərşənbə günü Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Cəlaloğlunun sözlərinə görə, qəbul olunan ilkin razılaşmada hərəkata daxil olan partiyaların hər birinin seçkilrədə öz namizədləri ilə iştirakı nəzərdə tutulur. "Amma digər bir razılaşmaya görə ayrı-ayrı partiyaların hər birinin irəli sürdüyü namizədlərin ümumi sayı əsasında vahid siyahı təşkil ediləcək. Bu isə o deməkdir ki, partiyalar bir-birinə alternativlik yaratmaq həcmində namizəd verəcəklər", - ADP sədri əlavə edib.
Cəlaloğlu deyib ki, hər bir məntəqədəki ümumi bələdiyyələrin sayına uyğun olaraq, bütün partiyalar üçün kvota müəyyənləşdiriləcək. "Əgər hər hansı partiyanın namizədi olmayacaqsa, onda başqa partiya əlavə öz namizədini buradan irəli sürə bilər", - partiya sədri vurğulayıb.
"Qarabağ və Respublika Uğrunda Hərəkat"ı Konstitusiyaya təklif edilən əlavə və dəyişiklilərlə bağlı 2009-cu il martin 18-də keçirilən referendum ərəfəsi Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları təsis edib.
Məqalə müəllifi ilə əlaqə ünvanı: [email protected]