Azərbaycan, Bakı, 08 oktyabr / Trend , müxbir R.Hafizoğlu/
Türkiyədə müxalifətdə olan Böyük Birlik Partiyasının (BBP) lideri Yalçın Topçu hesab edir ki, ölkənin yeni Konstitusiyaya ehtiyacı var.
"Türkiyənin yeni və daha sivil konstitusiyaya ehtiyacı var", - deyə cümə axşamı Topçu Ankaradan telefonla Trend -a bildirb.
Trend -un arayışı: Türkiyənin dövlət naziri Bülənt Arınc ölkə mətbuatının suallarını cavablandırarkən Türkiyədə Konstitusiyaya dəyişikliklər edilməsi üçün referendumun keçirilməsini istisna etməyib. Əgər Konstitusiyaya dəyişikliklərin edilməsi zərurəti ilə üzləşsək, referendum keçiriləcək. Xalq referendumda nə desə, onu da edəcəyik ", - deyə Arınc bildirib.
Konstitusiyaya ediləcək dəyişikliklərə prezidentin səlahiyyət müddətinin uzadılması, səlahiyyət müddəti bitən prezidentin yenidən namizədliyini irəli sürməsi, ölkədə ombudsmanlıq fəaliyyətinin və siyasi partiyaların bağlanılmasının çətinləşdirilməsi məsələsi daxil olacaq.
Türkiyədə keçirilən 29 mart bələdiyyə seçkilərindən sonra TBMM-in keçmiş sədri Köksal Toptan Türkiyə Konstitusiyasının dəyişikliyə ehtiyacı olduğunu bildirib. "Türkiyədə Konstitusiya dəyişikliyi qanun çərçivəsində ediləcək", - deyə Toptan bildirmişdi.
Türkiyənin Baş naziri Rəcəb Tayyib Ərdoğan da bələdiyyə seçkilərindən sonra Konstitusiyaya qismən də olsa dəyişiklik olacağını qeyd etmişdi.
Böyük Birlik Partiyası liderinin sözlərinə görə, bundan əvvəlki hökumətlər də Konstitusiyanı dəyişmək üçün cəhd göstəriblər, lakin bu cəhdlər türk xalqının mənafeyi üçün deyil, öz mənafeləri üçün olub.
"Təəssüflər olsun ki, nə bu günə qədər olan hakimiyyətlər, nə də bugünkü iqtidar millətin maraqlarını qoruya, təmin edə biləcək bir Konstitusiya dəyişikliyi etməyiblər", - deyə o qeyd edib.
Topçu onu da qeyd edib ki, əgər hakimiyyət Konstitusiyaya xalqın maraqlarını təmin edəcək dəyişiklik etmək istəyindədirsə, bunu gecikdirməməlidir.
"Konstitusiyaya dəyişiklik etmək istəyərkən müxalifətin də rəyi nəzər alınmalıdır. Çünki müxaliflərdən olan deputatları da xalq seçib", - deyə Topçu əlavə edib.
Müxalifət lideri onu da qeyd edib ki, Konstitusiya dəyişikliyi partiyanın daxili maraqlarını deyil, xalqın maraqlarını təmin etməlidir.
