Azərbaycan Prezidenti İlham Əliyev bazar ertəsi Azərbaycan Dövlət Filarmoniyasının kamera və orqan musiqisi zalı binasının təmiri və bərpası ilə əlaqədar tədbirlər haqqında sərəncam imzalayıb. Məlumatı AzərTAc Dövlət İnformasiya Agentliyi yayıb.
Sərəncamda, Azərbaycan Respublikasının 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Dövlət Filarmoniyasının kamera və orqan musiqisi zalı binasının təmiri və bərpası üçün 1,0 (bir) milyon manat məbləğində vəsaitin ayrılması qeyd olunur.
Maliyyə Nazirliyinə sərəncamda nəzərdə tutulmuş vəsaitin maliyyələşdirilməsini müəyyən olunmuş qaydada həyata keçirmək tapşırılıb.
1896-1899-cu illərdə yevangelik-lüteran kilsəsi kimi inşa edilən, sonralar müxtəlif mədəni tədbirlərin keçirilməsi üçün istifadə olunan Azərbaycan Dövlət Filarmoniyasının kamera və orqan musiqisi zalının binası Bakı şəhərinin gözəl memarlıq abidələrindən biridir.
Trend-in ən mühüm və maraqlı xəbərlərini "Telegram"da izləyin
