Gürcüstan, Tbilisi, 18 mart / Trend , müxbir N.Kirsxaliya/
Gürcüstanın reinteqrasiya məsələləri üzrə dövlət naziri Temur Yakobaşvili cümə axşamı səhər Vyanaya yola düşüb. Hava limanında dövlət naziri jurnalistlərə Cənubi Osetiyaya və Abxaziyaya dair Gürcüstanın dövlət strategiyasını ATƏT-in mənzil-qərargahına təqdim edəcəyini bildirib.
Onun sözlərinə əsasən, ATƏT səfirləri ilə strategiyanın müzakirəsi martın 19-da baş tutacaq. "Biz Aİ, ABŞ, BMT-nin sınağından müvəffəqiyyətlə keçən strategiyamızın təqdimatını keçirəcəyik", - Yakobaşvili bildirib.
O qeyd edib ki, münaqişənin həll edilməsi üçün bu sənədi yaxşı dayaq hesab edən elmi akademik dairələrin nümayəndələri və siyasətçilər strategiyanı qəbul edir.
Öz müstəqilliyini elan edən Abxaziya və Cənubi Osetiyanın liderləri sözügedən sənədin nəzərdən keçirilməsinə qarşıdır.