Azərbaycan, Bakı, 7 aprel /Trend, müxbir A.Hüseynbala/
Azərbaycanın müxalifət partiyasının sədri deyib ki, parlament seçkilərində iştirak edəcək namizədləri müəyyənləşdirməyə başlayıblar.
"Seçki Məcəlləsinə uyğun olaraq pulsuz təbliğat aparmaq imkanı əldə etmək üçün deputatlığa 60-dan çox partiya üzvünün namizədliyini irəli sürmək niyyətindəyik", - çərşənbə günü Trend-ə Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı bildirib.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Rüstəmxanlının sözlərinə görə, artıq partiya daxilində namizədliklərinin irəli sürüləcəyi şəxslərlə bağlı müzakirələr aparılır. "Çalışacağıq ki, namizədlərimiz irəli sürüldükləri dairələrdə tanınmış şəxslər olsunlar. Bu halda təbliğat və təşviqat kampaniyasını aparmaq da asan olur", - partiya sədri əlavə edib.
Millət vəkili parlament seçkilərində heç bir bloka qoşulmayacaqlarını və heç bir partiya ilə qarşılıqlı əməkdaşlıq etməyəcəklərini vurğulayıb.
Vətəndaş Həmrəyliyi Partiyası Milli Azadlıq Hərəkatının liderlərindən olan Sabir Rüstəmxanlının rəhbərliyi altında 1992-ci il sentyabrın 26-da bir qrup ziyalı tərəfindən yaradılıb. 1992-ci il noyabrın 3-də dövlət qeydiyyatına alınan VHP 1995, 2000, 2005-ci illərdə parlament, 2003-cü il prezident, 1999, 2004-cü il bələdiyyə seçkilərində iştirak edib. Partiyanın sədri millət vəkili, xalq şairi Sabir Rüstəmxanlı 1991-1995-ci illərdə mətbuat və informasiya naziri, 2003-cü il prezident seçkisində isə prezidentliyə namizəd olub.
