Аzərbaycan, Bakı, 31 avqust /Trend, müxbir S.Süleymanov/
Qazaxıstan Təhsil Nazirliyi respublika məktəblərində hicabın əleyhinədir. Bunu Astanada yeni dərs ilinin başlanğıcı ərəfəsində Qazaxıstanın təhsil naziri Janseit Tumebayev deyib.
"Biz Qazaxıstan məktəblərində hicabın qəti əleyhinəyik və bunun üçün bir çox səbəblər var. İlk növbədə, üzü praktiki olaraq tamamilə örtən paltar qazax xalqının adət-ənənəsinə uyğun deyil", - Tumebayev deyib.
Onun sözlərinə görə qazaxlar Mərkəzi Asiyada İslam dinini qəbul edən sonuncu xalqlardan biridir.
Nazirin sözlərinə görə, hicabdan imtinanın ikinci səbəbi ondan ibarətdir ki, buna razılıq verildiyi təqdirdə presedent yaranacaq.
"Bu gün Qazaxıstanda 140-dan çox etnik millət yaşayır. Hicab geyiminə icazə versək, o zaman sabah belə bir vəziyyət yarana bilər ki, müxtəlif millətlərin nümayəndələri məktəbdə öz milli geyimlərini geyinməyi tələb etsinlər", - nazir çıxışına yekun vurub.