Azərbaycan, Bakı, 27 yanvar /Trend, müxbir A.Axundov/
Türkiyə Böyük Millət Məclisinin (TBMM) Xarici əlaqələr komissiyası 2010-cu il avqustun 16-da imzalanan və 2010-cu il dekabrın 22-də Azərbaycan Milli Məclisi tərəfindən ratifikasiya edilən Azərbaycan və Türkiyə arasında strateji tərəfdaşlıq və qarşılıqlı yardım haqqında müqavilənin təsdiq edilməsi layihəsi üzərində işləyir. Bu barədə Trend-ə Türkiyə parlamentindən məlumat verilib.
Komissiya bu müqavilənin ratifikasiyası haqqında qanun layihəsinin müzakirəsinə dekabrın 24-də başlayıb. Müqavilə parlamentə dekabrın 8-də daxil olub.
"Xarici əlaqələr komissiyasından keçdikdən sonra bu müqavilənin ratifikasiyası haqqında qanun layihəsi TBMM-in Baş Assambleyasına çıxarılacaq, sonra isə o ölkə prezidenti tərəfindən təsdiq edilməlidir. Azərbaycanla bağlı qərarlar parlamentdə kifayət qədər sadə hazırlanır, bununla bağlı deputatlar arasında fikir ayrılığı olmur. Xarici əlaqələr komissiyasında layihənin hazırlanmasının dəqiq tarixini demək çətindir, lakin komissiyadan keçdikdən sonra bu saziş bir ay ərzində qüvvəyə minə bilər", - parlamentdən deyiblər.
Parlamentdən bildirdiklərinə görə, 2010-cu il dekabrın 16-da Ankarada imzalan və yanvar ayında Azərbaycan Prezidenti İlham Əliyev tərəfindən təsdiqlənən Azərbaycan və Türkiyə hökumətləri arasında hərbi maliyyə əməkdaşlığı haqqında sazişin ratifikasiyası Türkiyə parlamentində hələ ki qaldırılmayıb.
"Heç də sazişlərin hamısı parlamentdə təsdiq edilməməlidir. Bəziləri parlamentdən keçdikdən sonra, bəziləri isə birbaşa qüvvəyə minir", - parlamentdən qeyd ediblər.
Hazırda Türkiyə parlamentində Azərbaycan və Türkiyə hökumətləri arasında imzalanan 8 saziş müzakirə edilir. Onlardan ikisinin ratifikasiyası haqqında qanun layihəsi artıq hazırlanıb və Baş Assambleyaya təqdim edilib, 6 sazişin ratifikasiyası haqqında qanun layihəsi Xarici əlaqələr komissiyasında hazırlanır.
Xarici əlaqələr komissiyanın 2011-ci il yanvarın 5-də keçirilən son iclasında komissiya 2005-ci il iyunun 30-da imzalanan Azərbaycan və Türkiyə hökumətləri arasında müəllif və intellektual hüquqları sahəsində əməkdaşlıq haqqında sazişin bəyənilməsinə dair qanun layihələrinin son variantlarını, eləcə də Türkiyə və Azərbaycan hölumətləri arasında 1998-ci il iyulun 17-də imzalanan sosial müdafiə haqqında müqaviləyə əlavə sazişi təqdim edib və onları TBMM-in Baş Assambleyasına verib.
Azərbaycan və Türkiyə arasında strateji tərəfdaşlıq və qarşılqılı yardım haqqında müqavilənin ratifikasiyasına dair qanun layihəsindən başqa, Türkiyənin Xarici əlaqələr komissiyası daha beş sazişin qanun layihəsinin ratifikasiyasını müzakirə edir:
- 2007-ci il 6 noyabrda Türkiyə Qadın və Ailə Məsələləri üzrə Nazirliyi və Azərbaycan Ailə, Qadın və Uşaq Problemləri üzrə Dövlət Komitəsi arasında imzalanan saziş;
- 2007-ci il noyabrın 6-da imzalanan Türkiyə və Azərbaycan arasında uzunmüddətli iqtisadi və ticari əməkdaşlıq proqramları və onun həyata keçirilməsi planları;
- 2007-ci il noyabrın 6-da imzalanan Türkiyə və Azərbaycan hökumətləri arasında birgə əməkdaşlıq üzrə saziş;
- 2008-ci il yanvarın 24-də Türkiyə Baş naziri Aparatı yanında Əməkdaşlıq və inkişaf idarəsi ilə Azərbaycan Rabitə və İnformasiya Texnologiyaları Nazirliyi və Milli Televiziya və Radio Şurası arasında televiziya verilişləri sahəsində əməkdaşlıq protokolu, eləcə də texniki xidmət üzrə saziş;
- 2008-ci il iyunun 3-də imzalanan Türkiyə və Azərbaycan arasında dövlət işçilərinin idarə edilməsinin təkmilləşdirilməsi və dəstəklənməsi üzrə protokol.
