...

Türkiyə qardaş Azərbaycanın maraqlarını Ermənistanın maraqlarına qurban verməz - Baş nazir (ƏLAVƏ OLUNUB)

Siyasət Materials 13 Aprel 2011 16:45 (UTC +04:00)
Türkiyə qardaş Azərbaycanın maraqlarını Ermənistanın maraqlarına qurban verməz.
Türkiyə qardaş Azərbaycanın maraqlarını Ermənistanın maraqlarına qurban verməz - Baş nazir (ƏLAVƏ OLUNUB)

Birinci abzasdan sonra təfərrüatlar əlavə olunub (ilk xəbər saat 16:31-də yayılıb)

Türkiyə qardaş Azərbaycanın maraqlarını Ermənistanın maraqlarına qurban verməz. Trend-in məlumatına görə, bu barədə Türkiyənin Baş naziri Rəcəb Tayyib Ərdoğan AŞ PA-nın yaz sessiyasında çıxışı zamanı bildirib. Məlumatı CNN Türk telekanalı yayıb.

"Türkiyə-Ermənistan protokollarının həyata keçirilməsi üçün əsas bənd Ermənistan tərəfindən işğal olunmuş Azərbaycan torpaqlarının azad edilməsidir ki, bu da protokollarda göstərilib", - Ərdoğan deyib.

Onun sözlərinə görə, erməni tərəfi bu vacib şərti yerinə yetirən kimi, Türkiyə dərhal öz sərhədlərini açacaq.

"Biz ATƏT-in Minsk qrupunu öz öhdəliklərinə əməl etməyə çağırırıq. Rusiya, Fransa və ABŞ bunu edən kimi, biz Dağlıq Qarabağ münaqişəsinin həllini tapacağıq", - Baş nazir bildirib.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti