Azərbaycan, Bakı, 4 may /Trend/
Azərbaycanın xarici işlər naziri Elmar Məmmədyarov Serbiyanın xarici işlər naziri Vuk Yeremiçin dəvəti ilə ikigünlük rəsmi səfərlə Belqrada gedib.
Trend-in Azərbaycan XİN-in mətbuat xidmətinə istinadən yaydığı məlumata görə, mayın 3-də Məmmədyarov və Yeremiçin iştirakı ilə Serbiya XİN-in binasında yaradılmış Azərbaycan salonunun təntənəli açılış mərasimi keçirilib.
Açılış mərasimindən sonra Azərbaycan salonunda Məmmədyarovun Yeremiçlə əvvəlcə təkbətək, sonra isə nümayəndə heyətlərinin iştirakı ilə geniş tərkibdə görüşü keçirilib.
Geniş tərkibdə keçirilmiş görüşün əvvəlində Yeremiç Məmmədyarovu salamlayaraq, 2009-cu ildə özünün, 2010-cu ildə isə Serbiya Prezidenti Boris Tadiçin səfəri ilə əlaqədar Azərbaycanda olduğunu, səfərlərdən xoş təəssüratlarla ayrıldığını bildirib.
Məmmədyarov Ermənistan-Azərbaycan, Dağlıq Qarabağ münaqişəsi ilə bağlı Azərbaycanı dəstəklədiklərinə görə Serbiya rəhbərliyinə və şəxsən Yeremiçə təşəkkürünü ifadə edib. Azərbaycanlı nazir ATƏT-in Minsk qrupunun həmsədrlərinin vasitəçiliyi ilə münaqişənin sülh yolu ilə həlli istiqamətində aparılan danışıqlar prosesi və son durum haqqında həmkarını məlumatlandırıb. Eyni zamanda, o, hazırda Serbiyanın bir nömrəli problemi olan Kosovo problemi ilə bağlı Azərbaycanın məlum mövqeyini bir daha təkrarlayıb.
Yeremiç Kosovo məsələsi ilə bağlı həm ikitərəfli görüşlərdə, həm də beynəlxalq təşkilatlar çərçivəsində Serbiyanın mövqeyinin birmənalı şəkildə dəstəklədiyinə görə Azərbaycan dövləti və hökumətinə minnətdarlığını bildirib.
Görüşdə iki ölkə arasında bütün istiqamətlərdə hərtərəfli əlaqələrin inkişafı üçün böyük potensialın olduğu qeyd edilib. Azərbaycan Prezidenti İlham Əliyevin bu il iyunun 8-9-da Serbiyaya nəzərdə tutulan səfəri barədə fikir mübadiləsi aparılıb. Eləcə də, müqavilə-hüquq bazasının genişləndirilməsi, iqtisadi, ticarət, turizm və mədəniyyət sahəsində, eləcə də XİN-lər arasında, beynəlxalq və regional təşkilatlar çərçivəsində əməkdaşlığın dərinləşdirilməsi və möhkəmləndirilməsi məsələləri müzakirə olunub.
Görüşdən sonra hər iki nazir Serbiya KİV-i qarşısında qısa bəyanatla çıxış ediblər.
Həmin gün Məmmədyarov Belqrad şəhərinin meri, hakim Demokratik Partiyanın sədr müavini Draqan Cilasla görüşüb. Görüş zamanı Cilas Azərbaycanla Serbiya arasında münasibətlərin dinamik inkişaf etdiyini, ölkələrimiz arasında müxtəlif sahələrdə əlaqələrin getdikcə genişləndiyini qeyd edib. Mer Azərbaycan rəhbərliyinə onu Bakıya dəvət etdiyinə görə dərin minnətdarlığını bildirərək, Bakıya məmnuniyyətlə səfər edəcəyini deyib. O, Azərbaycan səfirliyi tərəfindən Serbiyada həyata keçirilən humanitar layihələr, həmçinin Belqrad sakinlərinin ən sevimli istirahət yerlərindən olan "Taşmaydan parkı"nın bərpa və abadlaşdırılması layihəsi ilə bağlı Azərbaycan rəhbərliyinə və hökumətinə minnətdarlığını bildirib.
Məmmədyarov ölkələrimiz arasında əlaqələrin inkişafından məmnun qaldığını qeyd edib. O, 2009-cu ildə Yeremiçin, 2010-cu ilin 12-13 may tarixlərində isə Serbiya Prezidenti Boris Tadiçin Azərbaycana səfərlərinin ikitərəfli əlaqələrin genişləndirilməsi üçün zəmin yaratdığını, Azərbaycan Respublikasının Prezidenti İlham Əliyevin bu ilin iyununda Serbiyaya nəzərdə tutulan səfərinin ikitərəfli əlaqələrin inkişafına yeni təkan verəcəyinə əmin olduğunu bildirib. Məmmədyarov "Taşmaydan parkı"nın abadlaşdırılması, orada Azərbaycan xalqının ümummilli lideri Heydər Əliyevin və görkəmli serb yazıçı Milorad Paviçin heykəllərinin ucaldılması, Novi Sad şəhərində isə dahi Azərbaycan bəstəkarı Üzeyir Hacıbəylinin büstünün qoyulmasını xalqlarımız arasında mövcud olan dostluq münasibətlərinin təzahürü kimi dəyərləndirib.
Sonra Məmmədyarov Belqrad şəhərinin baş memarı və merin müavini, Azərbaycan tərəfindən "Taşmaydan parkı"nın yenidənqurulması və abadlaşdırılması layihəsinin müəllifi memar Eldar Hüseynovun iştirakı ilə parkda abadlaşdırma işlərinin gedişatı ilə tanış olub.