Azərbaycan, Bakı, 23 fevral /Trend, müxbir E.Mehtiyev/
İsa Qəmbər Müsavat Partiyasının başqanlığına namizədliyini irəli sürməyəcəyini bir daha bəyan edib.
Trend-in məlumatına görə, cümə axşamı keçirdiyi mətbuat konfransında Müsavat Partiyasının başqanı İsa Qəmbər Partiyanın VIII qurultayında namizədliyini irəli sürməyəcəyini bir daha söyləyib. O qeyd edib ki, əgər namizədliyini irəli sürərdisə, partiya üzvlərinin əksəriyyətinin dəstəyini ala bilərdi.
"Müsavat Partiyasının VIII qurultayını Bakıda keçirmək niyyətindəyik", - partiya başqanı deyib.
İsa Qəmbər onu da qeyd edib ki, qurultayda Müsavatın 2013-cü il prezidentliyə namizədinin irəli sürülməsi məsələsi müzakirə olunacaq.