Azərbaycan, Bakı, 14 sentyabr /Trend/
Sentyabrın 14-də Azərbaycan Prezidenti İlham Əliyev XIV London Paralimpiya Oyunlarında ölkəmizi təmsil etmiş idmançıları və onların məşqçilərini qəbul edib.
"Mən sizi ürəkdən salamlayıram və Londonda qazanılmış böyük qələbə münasibətilə ürəkdən təbrik edirəm. Bizim paralimpiyaçılarımız Azərbaycan bayrağını yüksəklərə qaldırdılar. Bu, böyük qələbədir, böyük nailiyyətdir. Bizim komandamız 21 idmançı ilə təmsil olunmuşdur", - İlham Əliyev idmançılarla görüşündə çıxışı zamanı deyib.
Prezidentin sözlərinə görə, idmançılarımız medallar qazanıblar, toplam 12 medal. Elə idmançımız da var ki, bir neçə medal qazanıb.
"Hesab edirəm ki, bu da çox gözəl nəticədir, çox böyük qələbədir. Bizim komanda 27-ci yerdədir. Dörd qızıl, beş gümüş, üç bürünc medalımız vardır. Bu, doğrudan da böyük və tarixi qələbədir. Paralimpiyaçılarımız artıq bir neçə dəfədir ki, Paralimpiya Oyunlarında iştirak edirlər. Ancaq ən böyük qələbə məhz London oyunlarında qazanılmışdır. Mən Sizi bir daha bu böyük qələbə münasibətilə ürəkdən təbrik edirəm. Siz bütün xalqımızı sevindirmisiniz, peşəkarlığınızı, Vətənə bağlılığınızı göstərmisiniz. Çünki idman qələbələrinin mənbəyi Vətənə, xalqa olan məhəbbət və sədaqətdir", - Prezident deyib.
Dövlət başçısı bildirib ki, Azərbaycan idman dövlətidir.
"Artıq mən bu barədə bir neçə dəfə fikirlərimi bildirmişəm. Həyat və sizin uğurlarınız bu sözləri bir daha təsdiqləyir. Çünki həm Olimpiya, həm Paralimpiya oyunlarında idmançılarımız şərəflə çıxış etmişlər. Dünya miqyasında yüksək pilləyə qalxmaq çox böyük nəticədir. Hər bir qələbə, hər bir uğur ölkəmizi daha da ucaldır. Bu, əlbəttə ki, sizin qələbənizdir, idmançıların, onların məşqçilərinin, idman mütəxəssislərinin uğurudur. Ancaq bununla bərabər, bütün xalqımızın, dövlətimizin uğurudur. Londonda həm olimpiyaçılarımız, həm ondan sonra sizin bizə bəxş etdiyiniz o sevincli günləri, anları biz heç vaxt unutmayacağıq. Sizin hər bir qələbənizi hər bir vətəndaş öz qələbəsi kimi qəbul etmişdir", - İlham Əliyev bildirib.
Dövlət başçısı qeyd edib ki, Azərbaycan doğrudan da idmanda böyük uğurlara nail ola bilib.
"İdman infrastrukturu yaradılır. Paralimpiyaçılar üçün 2008-ci ildə yeni idman kompleksi tikilib istifadəyə verilmişdir. Mən xatırlayıram, Pekinə yola düşərkən biz sizinlə orada görüşmüşdük. Pekində də nəticələr yaxşı idi. Londonda isə nəticələr ən yüksək səviyyədədir. Biz artıq tanınmış idman dövlətlərinin arasında özümüzə layiq yer tapa bilmişik. Əlbəttə, bu qələbə bizi həm ruhlandırır, həm də onu göstərir ki, gələcəkdə bundan da böyük qələbələr olacaqdır. Çünki o da çox əlamətdar bir haldır ki, həm Olimpiya Oyunlarında, həm Paralimpiya Oyunlarında ildən-ilə qələbələrin sayı artır və komandalarımızın komandalar arasında yeri daha da yüksəlir. Yəni, bu, onu göstərir ki, dinamika vardır. Ona görə, vətəndaşlarımız bir növ bu vəziyyətə öyrəşmişlər. Hər dəfə idmançılardan daha da böyük qələbələr gözləyirlər və haqlıdırlar. Amma, eyni zamanda, qələbə qazanmaq çox çətindir, çox böyük fiziki, mənəvi güc və peşəkarlıq tələb edir", - Prezident çıxışında bildirib.
Dövlət başçısı qeyd edib ki, Azərbaycanın qələbəsi dünyaya səs salıb və bu da onu göstərir ki, qələbələrimiz təsadüfi xarakter daşımır.
"Həm Olimpiya Oyunlarında, ondan sonra Paralimpiya Oyunlarında komandamız ən yüksək yerlərdədir. Dörd qızıl, beş gümüş, üç bürünc medal, 27-ci yerdə olmaq böyük şərəfdir. Bu münasibətlə mən sizin hamınızı ürəkdən təbrik edirəm. Siz bu qələbəyə layiqsiniz. Mən sizinlə və olimpiyaçılarımızla Olimpiya Oyunlarının ərəfəsindəki görüşü xatırlayıram. Biz sizi yola salarkən böyük ümidlərlə gələcəyə baxırdıq. Mən şəxsən əmin idim ki, siz bizi sevindirəcəksiniz, Azərbaycan xalqını sevindirəcəksiniz. Belə də oldu. Bu qələbə sizə layiqdir, bu qələbə Azərbaycana layiqdir, Azərbaycan da bu qələbəyə layiqdir. Azərbaycan güclü dövlətdir, dinamik inkişaf edən dövlətdir. Bütün sahələrdə uğurlarımız var, Azərbaycan bütün sahələrdə inamla irəliləyir. Azərbaycanın istər siyasi müstəvidə, beynəlxalq aləmdə, istərsə də iqtisadi sahədə uğurları artıq reallıqdır, dünya ictimaiyyəti bunu bilir və təqdir edir. Bəzi hallarda bizim təcrübəmiz öyrənilir, Azərbaycanda gedən proseslər nümunəvi xarakter alır", - dövlət başçısı vurgulayıb.
İlham Əliyev qeyd edib ki, idman hər bir ölkənin gücünü göstərir.
"İdmana olan diqqət və qayğı hər bir ölkənin dövlət siyasəti olmalıdır. Azərbaycanda bu, belədir. Uğurlarımızın təməlində məhz dövlət siyasəti dayanır. Bizdə çox gözəl gənc nəsil yetişir. Baxın, Olimpiya Oyunlarından sonra güləş üzrə dünya çempionatında gənclərimiz birinci yerə çıxdılar. Yeniyetmələr arasında birinci Olimpiya Oyunlarında cavanlarımız 11-ci yerə nail ola biliblər. Yəni, yeni nəsil yetişir, dinamika, düşünülmüş yanaşma, proqram, konsepsiya və dövlət siyasəti vardır. Məhz dövlət siyasəti, idmançılarımızın peşəkarlığı, mütəxəssislərin fəaliyyəti, federasiyaların, Olimpiya və Paralimpiya komitələrinin birgə fəaliyyəti bu uğurları şərtləndirir. Amma son sözü idmançılar deyirlər. Son söz sizindir və siz də bu sözü demisiniz, bizi sevindirmisiniz, Vətənə böyük qələbə ilə qayıtmısınız. Mən sizi bir daha ürəkdən təbrik edirəm, sizə yeni uğurlar və cansağlığı arzulayıram", - Prezident çıxışının sonunda deyib.
