Gürcüstan, Tbilisi, 2 noyabr/Trend, müxbir N. Kirsxaliya/
Gürcüstanın Baş naziri Bidzina İvanişvili Prezident Mixail Saakaşvilini Prezident Sarayını tərk edərək dövlət dəftərxanasında işləməyə çağırıb. Trend-in məlumatına görə, İvanişvili hökumətin iclasında bəyan edib ki, bu təklif Prezident Administrasiyasının saxlanılmasına çəkilən xərcləri maksimum azaltmaqla əlaqədardır.
"Prezident təkcə elektrik enerjisinə görə 800 000 lari (1 dollar= 1,66 lari) xərcləyir, dövlət büdcəsi isə belə həcmdə xərcləri üzərinə götürə bilməz", - Baş nazir qeyd edib.
İvanişvili vurğulayıb ki, 2013-cü ildən o, dövlətin birinci şəxsi olacaq və Prezident Sarayı onun sərəncamına keçməlidir, lakin oraya köçmək niyyətində deyil.
İvanişvili Saakaşviliyə Gürcüstan hökuməti və Baş nazirinin olduğu dövlət dəftərxanasına gəlməyi məsləhət görür.