Azərbaycan, Bakı, 1 oktyabr /Trend, müxbirlər A.Bədəlova, S.İsayev/
"P5+1" müzakirəçilər qrupu İran tərəfinin daha müsbət üslubunu qeyd edir, lakin "altılıq" görməlidir ki, İranın sözləri əməllərlə möhkəmlənib. Bu barədə Trend-ə Avropa İttifaqının xarici işlər və təhlükəsizlik siyasəti üzrə ali nümayəndəsinin mətbuat katibi, "P5+1" ölkələrinin əsas müzakirəçisi Maykl Mann deyib.
İran və "P5+1" müzakirəçilər qrupu növbəti görüşlərin oktyabrın 15-16-də keçirilməsi barədə razılığa gəliblər. Görüşlərdə məqsəd İranın nüvə proqramı ilə bağlı münaqişənin nizamlanması üzrə səylərə təkan verməkdir.
M.Mannın sözlərinə görə, qarşıdakı danışıqların gedişatı əsasən İrandan asılıdır: "Yaxşı ab-hava məsələnin bir tərəfidir, lakin biz istəyirik ki, İran təkliflərimizə müsbət reaksiya versin. Biz danışıqlarda mümkün qədər tez irəliləyiş əldə etmək istəyirik və ümid edirik ki, İran da bunu arzulayır".
Bir qədər əvvəl oktyabrın 1-də Tehranda keçirilən mətbuat konfransında İran Xarici İşlər Nazirliyinin mətbuat katibi Mərzeh Əfhəm deyib ki, İran Cenevrədə "P5+1" qrupu ilə danışıqlara ikimərhələli yanaşma təklif edib.
Bu məsələni şərh edən M.Mann vurğulayıb ki, bu təklif barədə heç nə bilmir.
