Azərbaycan, Bakı, 13 dekabr /Trend, müxbir Təmkin Cəfərov/
İranın Azərbaycandakı səfirliyi Bakıda İran və ABŞ arasında İŞİD-lə bağlı gizli anlaşmanın əldə olunması barədə yayılan məlumatları təkzib edir. Bunu Trend-ə eksklüziv açıqlamasında İranın Azərbaycandakı səfirliyinin mətbuat xidmətinin rəhbəri Məhəmməd Ayətullahi deyib.
M.Ayətullahi bildirib ki, Azərbaycanın bəzi KİV-lərində Bakıda İslam Respublikası və ABŞ arasında İŞİD terror qruplaşması ilə bağlı gizli danışıqların aparılması barədə yayılan xəbərlər əsassızdır: "İran və ABŞ rəsmiləri arasında Bakıda heç bir danışıq aparılmayıb".
Qeyd edək ki, bəzi KİV-lərdə "etibarlı mənbə"yə istinadən bu yaxınlarda Bakıda ABŞ və İran nümayəndələri arasında İŞİD-lə bağlı razılıq əldə olunması barədə məlumat yayılmışdı.