...

Romanın Sapienza Universitetində Azərbaycanla bağlı konfrans keçirilib (FOTO)

Siyasət Materials 25 Yanvar 2018 19:22 (UTC +04:00)
Romanın Sapienza Universitetində Azərbaycanla bağlı konfrans keçirilib
Romanın Sapienza Universitetində Azərbaycanla bağlı konfrans keçirilib (FOTO)

Trend-i buradan izləyin

Bakı. Trend:

Romanın Sapienza Universitetində Roma Sapienza Fondu, eləcə də həmin universitetin Kommunikasiya və Sosial Araşdırmalar Departamentinin təşkilatçılığı ilə “İtaliyada Azərbaycanla bağlı araşdırmalar: mövzular və perspektivlər” adlı akademik konfrans keçirilib.

Azərbaycanın İtaliyadakı səfirliyindən Trend-ə verilən məlumata görə, konfransı giriş sözü ilə açan Sapienza Universitetinin rektoru Eugenio Qaudio Azərbaycan və İtaliya arasında bütün sahələrdə sıx əməkdaşlıq əlaqələrinin mövcud olduğunu, son illərdə İtaliyada, xüsusilə Sapienza Universitetdə təhsil alan azərbaycanlı tələbələrinin sayının əhəmiyyətli dərəcədə artdığını və rəhbərlik etdiyi Universitetdə Azərbaycanla bağlı konfransın keçirilməsindən məmnun olduğunu və belə tədbirlərin iki ölkə arasında münasibətlərin inkişafına töhfə verdiyini deyib.

Azərbaycanın İtaliyadakı səfiri Məmməd Əhmədzadə öz çıxışında ölkəmizin tarixi, hazırkı reallıqları, Azərbaycan Prezidenti tərəfindən 2018-ci ilin “Azərbaycan Xalq Cümhuriyyəti” ili elan edildiyi, Azərbaycanın bu il müstəqilliyin bərpasının 27-ci ilini qeyd edəcəyini və bu illər ərzində ölkəmizin əldə etdiyi uğurlar, eyni zamanda Ermənistan-Azərbaycan Dağlıq Qarabağ münaqişəsi kimi mövzulara toxunub. Azərbaycan-İtaliya münasibətlərindən də danışan diplomat ötən il iki ölkə arasında diplomatik əlaqələrin qurulmasının 25 illiyinin qeyd edildiyini və münasibətlərdə əldə olunmuş nəticələr və perspektivlər barədə fikirlərini bölüşüb.

Daha sonra Roma Sapienza Fondunun sədri Antonello Biagini, Universitetin Avropa Tarixi Doktoranturasının kordinatoru Alessandro Saggioro, habelə Əməkdaşlıq və İnkişaf Proqramının rəhbəri Marko Kilento çıxış edərək Azərbaycan haqqında həqiqətlərin, ölkənin inkişafı, İtaliya ilə münasibətləri və beynəlxalq münasibətlərdəki rolunun öyrənilməsi baxımında konfransın əhəmiyyətini qeyd edib.

Qeyd edək ki, konfrans dörd paneldən, müvafiq olaraq Hüquq, Tarix, Sosial və Siyasi Elmlər və Azərbaycanla bağlı araşdırma aparan doktorantlar hissələrindən ibarət olub. Bu panellərdə Ermənistan-Azərbaycan münaqişəsinin hüquq aspektləri, Azərbaycanın tarixi, enerji siyasəti, Türkiyə, İran, Rusiya, regionun digər ölkələri, ABŞ və Aİ ilə münasibətləri, ictimai diplomatiya, Azərbaycanda sosial rifah və Azərbaycan ədəbiyyatı, İtaliyada Azərbaycanla bağlı nəşr olunan kitablar kimi mövzular üzrə çıxışlar olub.

Tədbirdə İtaliyada Azərbaycanla bağlı araşdırma aparan tədqiqatçılar iştirak etmişlər.

Məqalədə:
Xəbər lenti

Xəbər lenti