Bakı. Rufiz Hufizoğlu - Trend:
Yerevanın Ankara ilə münasibətləri yaxşılaşdırmağa hazır olması barədə bəyanatı etimad doğurmur.
Bunu Trend-ə Türkiyə hökumətindəki mənbə bildirib.
Mənbənin sözlərinə görə, Nikol Paşinyanın Türkiyə ilə münasibətlərin normallaşdırılması haqqında bəyanatına baxmayaraq, Ermənistan bu istiqamətdə heç bir addım atmayıb:
"Məlum olduğu kimi, Ermənistan Türkiyə ərazilərinə iddia edir, Türkiyəni tarixi faktlarla təsdiq olunmayan qondarma "erməni soyqırımı"nda ittiham edir".
O qeyd edib ki, əgər Ermənistan həqiqətən də Türkiyə ilə münasibətləri normallaşdırmaq istəyirsə, ilk növbədə, Ankaranın ünvanına olan bütün bu iddialardan əl çəkməlidir:
"Həmçinin rəsmi Yerevan beynəlxalq hüquqa hörmət etməlidir, işğal etdiyi Azərbaycan torpaqlarını qeyd-şərtsiz azad etməlidir".
Xatırladaq ki, bir müddət əvvəl Ermənistanın Baş naziri Nikol Paşinyan ölkəsinin heç bir ilkin şərt olmadan Türkiyə ilə münasibətlər qurmağa hazır olduğunu bəyan edib.
