İyulun 13-də "Yeni Siyasət" (YeS) seçki blokunun toplantısında ötən gün blokuna daxil olan siyasi partiyalar arasında, seçki blokunun yaradılması ilə bağlı imzalanmış saziş təsdiqlənib. Bu barədə Trend ə "YeS"in mətbuat xidmətinin rəhbəri Elza Alışova bildirib.
Onun sözlərinə görə, "YeS" seçki blokunun təsis edilməsi ilə bağlı sazişi Azərbaycan Milli İstiqlal Partiyasının (AMİP) sədri Əli Əliyev, Azərbaycan Sosial-Demokrat Partiyasının (ASDP) həmsədri Araz Əlizadə və Milli Hərəkat Partiyasının(MHP) sədri Samir Cəfərov imzalayıblar.
"Seçki blokunun bu gün keçirilmiş toplantısında Etibar Məmmədov, Eldar Namazov, Əli Əliyev, Adnan Novruzov, Araz Əlizadə, Əli Məsimov, Yaqub Məmmədov, Vahid Əhmədov, Rəhim Hüseynov, Samir Cəfərov, Eldəniz Quliyev və Rəşid Hacılı "YeS"in səlahiyyətli nümayəndələri seçiliblər",-deyə, mətbuat xidmətinin rəhbəri bildirib.
Onun sözlərinə görə, toplantıda həmçinin, "YeS"in Mərkəzi Seçki Komissiyasındakı (MSK) səlahiyyətli nümayəndələri müəyyənləşdirilib. İclasda seçki bloku adından MSK ilə sənədləşmə işlərinin aparılması səlahiyyətləri AMİP-in təmsilçisi Adnan Novruzova həvalə edilib.
