"Yeni Siyasət" blokunun siyasi bloka çevrilməsinə hazırlıqla bağlı işçi qrupu yaradılıb. Bu barədə Trend ə adıçəkilən blokun təsisçilərindən Azərbaycan Ziyalılar Hərəkatının (AZH) lideri Eldəniz Quliyev bildirib.
E.Quliyev bildirib ki, işçi qrupunu formalaşdırmaq blokun digər təsisçisi Azərbaycan Naminə İctimai Forumun prezidenti Eldar Namazova həvalə olunub: "Qərara alınıb ki, təkrar seçkilərə qədər blokun siyasi fəaliyyət proqramı və prinsipləri ilə bağlı təkliflər paketi hazırlanıb Koordinasiya Şurasının üzılərinə təqdim olunsun". AZH lideri onu da vurğulayıb ki, "Yeni Siyasət" blokunun gələcəkdə siyasi blok kimi digər qurumlar və partiyalarla da əməkdaşlığı istisna deyil.
E.Quliyev onu da qeyd edib ki, hazırda blokda "təmizləmə" əməliyyatı aparılır: "Artıq blokumuz şəxsiyyətlər ünvanına çevrilib. Mən elə düşünürəm ki, AMİP və ASDP-siz blok daha perspektivli görünəcək". Blok rəsmisi onu da vurğulayıb ki, təkrar seçkilərdən sonra quruma əlavə qüvvələr də cəlb olunacaq.