...

"Bizim Azərbaycan" bloku vasitəçilik missiyasının Minsk qrupundan alınıb BMT-yə verilməsini tələb edir

Siyasət Materials 25 Sentyabr 2006 12:28 (UTC +04:00)

Trend-i buradan izləyin

"Bizim Azərbaycan" bloku Sədrlər Şurası Dağlıq Qarabağ məsələsi ilə bağlı mövqeyini dəqiqləşdirərək vasitəçilik missiyasının ATƏT-in Minsk qrupundan alınıb BMT-yə verilməsini tələb edir. Bu barədə Trend ə adıçəkilən blokun sədri, Türk Millətçi Partiyasının lideri Vüqar Bəyturan bildirib.

V.Bəyturan qeyd edib ki, "Bizim Azərbaycan" bloku Sədrlər Şurasının sentyabrın 23-də keçirilən növbəti iclasında bir çox məsələlərlə yanaşı Dağlıq Qarabağ probleminin BMT-nin Baş Assambleyasının 61-ci sessiyasının gündəliyinə salınması da müzakirə olunub: "Sədrlər Şurası qərara alıb ki, problemin həlli ilə bağlı vasitəçilik missiyası Minsk qrupundan alınıb BMT-yə verilsin. Biz güman edirik ki, BMT bu məsələdə obyektiv mövqe nümayiş etdirəcək".

Blokun sədri onu da bildirib ki, iclasda 18-20 sentyabrda Türkdilli Dövlətlərin 10-cu Dostluq, Qardaşlıq və Əməkdaşlıq qurultayında Dağlıq Qarabağ və Şimali Kipr məsələsinin də gündəmə gətirilməsi müzakirə olunub və alqışlanıb.

Qeyd edək ki, bundan sonra adıçəkilən blokun Sədrlər Şurasının toplantıları həftənin çərşənbə axşamı saat 15.00-da keçiriləcək.

Xatırladaq ki, müxalifətdəki "Bizim Azərbaycan" bloku 2003-cü ildə prezidentliyə namizəd, Müsavat Partiyasının sədri İsa Qəmbərin təşəbbüsü ilə yaradılıb. İ.Qəmbər prezident seçkilərində məğlub olduqdan sonra blok arasında fikir ayrılığı yarandı. 2005-ci il parlament seçkiləri öncəsi blok iki yerə parçalandı. İ.Qəmbərin liderliyini qəbul etməyən "Bizim Azərbaycan" blokunda 10 siyasi partiya təmsil olunur. Bu vaxta qədər blokda bir aylıq sədrlik institutu yaradılmışdı. Blokun Sədrlər Şurasının bir ay bundan öncə keçirilən toplantısında bu müddət bir illə əvəz olunub.

Xəbər lenti

Xəbər lenti