Noyabrın 21-dən Naxçıvan Protez Ortopedik Bərpa Mərkəzi Naxçıvan MR Əmək və Əhalinin Sosial Müdafiəsi Nazirliyinin xətti ilə Muxtar Respublikanın regionlarında əlil vətəndaşlara xidmət göstərmək məqsədilə səyyar müalicə işləri təşkil edəcək. Bu barədə Trend in Naxçıvan Bürosuna Naxçıvan Protez Ortopedik Bərpa Mərkəzindən məlumat verilib.
Hazırda rayon icra hakimiyyətləri və icra nümayəndəlikləri vasitəsilə əhalinin məlumatlandırılması işi aparılır. Səyyar müalicələr hər rayon ərazisində bir gün olmaqla həyata keçiriləcək və noyabr ayının sonlarında başa çatacaq.
Məlumat üçün deyək ki, qeyd olunan Mərkəz Naxçıvan MR Nazirlər Kabinetinin qərarı ilə bütün növ kateqoriyalı əlillər üçün protez-ortopedik xidmətlər həyata keçirir. Cari ildə mərkəz tərəfindən 170-dən artıq əlil vətəndaşa xidmət göstərilib və hər rübdə səyyar müalicələr təşkil olunub.