İqtidarla əməkdaşlıq çərçivəsində Vəhdət Partiyasının rəhbərliyi bir neçə dəfə dövlət rəsmiləri ilə görüşüb. Bu barədə Trend ə açıqlamasında Vəhdət Partiyasının sədri Tahir Kərimli bildirib.
Onun sözlərinə görə, iqtidarla əməkdaşlıq üçün prezident İlham Əliyevə etdikləri müraciətə müsbət cavab verilib.
"Rəsmilərlə görüşdə ümummilli məsələlərlə bağlı müzakirələr apardıq. Azərbaycanda aqrar islahatlar, bizim partiyanın hazırladığı "Azərbaycanlıların soyqırımı haqqında" qanun və fərman layihələri, regionların sosial-iqtisadi inkişafı və digər məsələlər haqqında fikir mübadiləmiz oldu" - deyə Tahir Kərimli vurğulayıb.
Lakin partiya sədri görüşdükləri rəsmilərin adlarını açıqlamaqdan imtina edib. T.Kərimli bildirib ki, bunu açıqlaması üçün görüşdüyü şəxslərlə qarşılıqlı razılıq olmalıdır: "Dialoq davam edir və inkişafdadır. Hesab edirəm ki, yaxın zamanlarda bu proses başa çatacaq və hər şeyi açıqlayacağıq."
Xatırladaq ki, 1990-cı ilin əvvəllərində yaradılan Vəhdət Partiyası 2005-ci ilin parlament seçkilərinə qədər müxalifətyönlü təşkilat kimi fəaliyyət göstərib. Seçkilərdən sonra partiya prezident İlham Əliyevin siyasi kursunu dəstəkləmək haqqında qərar qəbul edib. Partiyanın sədri Tahir Kərimlidir.
