Azərbaycan Demokrat Partiyası (ADP) "Azadlıq" blokunu tərk etməyib və blokda fəaliyyətini davam etdirəcəyini bəyan edib. Bu barədə Trend ə "Azadlıq" blokunun həmsədri Əli Əliyev məlumat verib.
Qeyd edək ki, bu gün - yanvarın 30-da blokun Sədrlər Şurasının toplantısı keçirilib və orada ADP Ali Məclisinin çıxardığı qərar, eks-prezident Əbülfəz Elçibəyin məzarüstü abidəsinin qoyulması ilə bağlı yaranmış vəziyyət, həmçinin blokun keçirəcəyi növbəti kütləvi tədbirlər müzakirə edilib. Əli Əliyevin sözlərinə görə, müzakirələrdə aydın olub ki, ADP-nin strateji hədəflərində, siyasi kursunda heç bir dəyişiklik baş verməyib və bu partiya "Azadlıq" blokunun həmtəsisçiliyini davam etdirəcək: "KİV-lərdə ADP-nin mövqeyi ilə bağlı yayılan müxtəlif fikirlərə aydınlıq gətirildi. Partiya sədrinin birinci müavini Sərdar Cəlaloğlu öz çıxışında açıq şəkildə bildirdi ki, ADP-nin siyasi kursunda dəyişiklik baş verməyəcək, partiyanın mövqeyi əvvəlki kimi prinsipial və birmənalı olacaq, həmçinin onun mübarizə üsulları sırasına kütləvi tədbirlər və etiraz aksiyaları da daxil ediləcək. ADP gələcəkdə "Azadlıq" blokunun bütün etiraz aksiyalarında iştirak edəcək".
Əli Əliyevin sözlərinə görə, ADP Ali Məclisinin çıxardığı yeni qərar bəzi bədxahlar tərəfindən mənfi mənada şərh edilib, partiyanın mövqeyində təhriflərə yol verilib. Blok həmsədrinin sözlərinə görə, ADP-nin siyasi kursundakı dəyişiklik bu pariyanın iqtidarla müxalifət arasında siyasi dialoq təşkil etmək təşəbbüsü ilə bağlıdır: "İqtidar-müxalifət münasibətlərinin gərginliyini nəzərə alaraq, ADP Yeni Azərbaycan partiyasını siyasi dialoqa dəvət edəcək və mövcud problemlərin tərəflər arasında müzakirə edilməsi üçün vasitəçilik missiyasını üzərinə götürür. Gələcəkdə də ADP ilə YAP arasında qurulacaq münasibətləri bütövlüklə iqtidar-müxalifət münasibətlərinə çevirmək məqsədi güdülür".
