Vətəndaş və İnkişaf Partiyası (VİP) dövlət qeydiyyatına alınmaması ilə əlaqədar olaraq beynəlxalq təşkilatlara və məhkəməyə müraciət edəcək. Bu barədə Trend ə açıqlamasında VİP sədri Əli Əliyev məlumat verib.
Ə.Əliyev qeyd edib ki, beynəlxalq təşkilatlara göndəriləcək məktub hazırdır.
"Həmin müraciətləri təkcə partiyamız deyil, "Azadlıq" blokundakı müttəfiqlərimiz adından göndərəcəyik. Blokun Sədrlər Şurasının növbəti iclasında bu məsələni müzakirə edəcəyik" - deyə VİP sədri əlavə edib.
Onun sözlərinə görə, məsələ ilə bağlı məhkəməyə müraciət etmək üçün aparılan hazırlıq da yekunlaşmaq üzrədir: "Lazımı sənədlər toplanıb və yaxın günlərdə məhkəməyə müraciət edəcəyik".
Qeyd edək ki, müxalifətyönlü Vətəndaş və İnkişaf Partiyası 2006-cı ildə Azərbaycan Milli İstiqlal Partiyasından (AMİP) ayrılmış bir qrup şəxs tərəfindən yaradılıb. Partiyanın sədri AMİP-in keçmiş sədri Əli Əliyevdir.