Azərbaycan, Bakı/ Trend , müxbir İ.Əlizadə/ Bu gün "Azadlıq" bloku Sədrlər Şurasının növbəti iclası keçiriləcək. Bu barədə Trend ə açıqlamasında blokun Sədrlər Şurasının üzvü, Vətəndaş və İnkişaf Partiyasının (VİP) sədri Əli Əliyev məlumat verib.
Ə. Əliyev qeyd edib ki, iclasda blokun üzvü olan Azərbaycan Demokrat Partiyasında (ADP) yaranmış vəziyyət müzakirə olunacaq. Lakin blokun ADP ilə bağlı qəbul etdiyi qərarın dəyişəcəyi gözlənilmir.
Qeyd edək ki, "Azadlıq" blokunda təmsil olunan partiyalar ADP-nin legitim strukturları kimi Sərdar Cəlaloğlunun rəhbərlik etdiyi təşkilatı tanıyırlar.
Ə.Əliyev vurğulayıb ki, Sədrlər Şurasının iclasında VİP-in dövlət qeydiyyatı problemi ilə bağlı blok adından beynəlxalq təşkilatlara göndəriləcək müraciət müzakirə olunacaq.
Qeyd edək ki, "Azadlıq" blokunda 4 müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur.
