Azərbaycan, Bakı / Trend müxbir İ.Əlizadə/ Azərbaycanın Milli Məclisi beynəlxalq təşkilatları və dünya ölkələrinin parlamentlərini Xocalı soyqırımını tanımağa və pisləməyə, bu cür faciələrin qarşısını almaq üçün təsirli tədbirlər görməyə çağırır. Milli Məclisin Xocalı faciəsinin 15-ci ildönümü ilə bağlı BMT, ATƏT, Avropa Şurası, Avropa Şurası Parlament Assambleyası, Avropa Parlamenti, MDB Parlament Assambleyası, NATO Parlament Assambleyası və dünya ölkələrinin parlamentlərinə ünvanladığı müraciətdə belə deyilir.
Qeyd edək ki, fevralın 26-da Milli Məclisdə Xocalı faciəsinin 15-ci ildönümünə həsr olunmuş dinləmələr başlayıb.
Dinləmələrin sonunda Xocalı faciəsi ilə bağlı qərar və bəyanat qəbul olunacaq. Bəyanatın mətnini millət vəkillərinin nəzərinə çatdıran deputat Jalə Əliyeva qeyd edib ki, Milli Məclis beynəlxalq təşkilatları və dünya ölkələrinin parlamentlərini Dağlıq Qarabağ münaqişəsinin hamı tərəfindən qəbul edilən beynəlxalq hüquq normaları və prinsipləri, xüsusən də beynəlxalq hüququn təməl prinsipini təşkil edən dövlətlərin ərazi bütövlüyü çərçivəsində həll olunmasına kömək göstərməyə çağırır.
"Milli Məclis Azərbaycanın Ermənistan tərəfindən işğal olunan ərazilərinin dərhal və qeyd-şərtsiz azad olunmasını, problemi BMT Təhlükəsizlik Şurasının Dağlıq Qarabağ münaqişəsi haqqında qəbul etdiyi 4 qətnamə, ATƏT-in Budapeşt, Lissabon və İstanbul sammitlərinin qərar və yekun sənədləri, AŞPA-nın 1416 saylı qətnaməsi əsasında həll etməyə çağırır", -deyə bəyanatda qeyd olunur.
Bundan başqa Milli Məclis Ermənistanı öz Silahlı Qüvvələrini Azərbaycanın işğal olunmuş ərazilərindən geri çəkməyə və Azərbaycanın ərazi bütövlüyünü tanımağa, rəsmi İrəvanı danışaqlarda konstruktiv mövqe tutmağa çağırır.
"Azərbaycan öz ərazisinin bir hissəsinin zəbt olunmasına imkan verə bilməz və mövcüd olan bütün imkanlardan istifadə edib öz ərazi bütövlüyünün bərpa olunmasına nail olacaq", -deyə Milli Məclisin bəyanatında bildirilir.
Milli Məclis əmindir ki, Azərbaycan Xocalı faciəsinin əsl hüquqi və siyasi qiymətini almasına, onun təşkilatçıları və icraçılarının cəzalandırılmasına nail olacaq.
