Azərbaycan, Bakı / Trend , müxbir E.Hüseynli/ Azərbaycanda iqtidar-müxalifət dialoqunun baş tutması üçün hər iki tərəfdən səmimi mövqe ortalığa qoyulmalı, əvvəlcədən hansısa şərtlər irəli sürülməlidir. Bu barədə bazar ertəsi Trend ə açıqlamasında Yeni Azərbaycan Partiyası (YAP) sədrinin müavini, icra katibi Əli Əhmədov məlumat verib.
Onun sözlərinə görə, YAP dəfələrlə iqtidar-müxalifət dialoqunun müxtəlif formatlarda baş tutması üçün qətiyyət göstərib.
"İndinin özündə də dialoq tərəfdarı olduğumuzu bəyan edirik. Ancaq dialoq mühitinin formalaşması üçün bir tərəfin səmimi şəkildə dialoqu istəməsi yetərli deyil. Belə bir mühit formalaşacaqsa, dialoqu təşkil etmək çətin olmaz" - deyə Əhmədov əlavə edib.
Azərbaycanda bir neçə ildir, iqtidar-müxalifət dialoqunun baş tutması üçün müxtəlif təkliflər səsləndirilsə də, hələki heç bir nəticə əldə olunmayıb.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
