Azərbaycan, Bakı, 14fevral / Trend , müxbir A.Salmanov/ "Azal"ın sabiq idarə rəisinin və onunla birgə həbs olunan 4 nəfərin qapalı məhkəmə prosesi başlayıb.
Cümə axşamı keçirilən prosesdə dövlət ittihamçısı ittiham aktını elan edib.
Dövlət Konserninin Aviasiya Təhlükəsizliyi İdarəsinin rəisi Emil Süleymanov, idarənin Operativ İdarəetmə Xidmətinin rəisi Tamerlan Mikayılov, xidmətin mühəndis-elektronçusu Tahir Əsədzadə, idarənin mühəndis-proqramçısı Faiq Quliyev və Milli Təhlükəsizlik Nazirliyinin əməkdaşı polkovnik-leytenant Rafət Əliyev Cinayət Məcəlləsinin qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə (228.1-ci), dövlətə xəyanət (274-cü), vəzifə səlahiyyətlərini aşma (308-ci) və digər maddələri ilə ittiham olunurlar.
Məhkəmə prosesi fevralın 25-də davam etdiriləcək. Həmin gün təqsirləndirilən şəxslər məhkəmədə sərbəst ifadə verəcəklər.
Təqsirləndirilən şəxslər Milli Təhlükəsizlik Nazirliyinin İstintaq Təcridxanasında saxlanılır. Əsədzadə ötən il iyulun sonlarında, Mikayılov avqustun 1-də, Süleymanov isə sentyabrın 6-da həbs edilib.