Azərbaycan, Bakı, 27 mart / Trend , müxbir K.Zərbalıyeva/ "Gündəlik Azərbaycan" və "Realnıy Azerbaydjan" qəzetlərinin həbsdə olan baş redaktoru Eynulla Fətullayev aclıq aksiyasına başlayıb.
Baş redaktorla görüşdən qayıdan vəkil İsaxan Aşurov cümə axşamı Trend a bildirib ki, Fətullayev bütün siyasi məhbusların və həbsdə olan jurnalistlərin və siyasi məhbusların azad olunması üçün Avropa qurumlarının təsirli mexanizmlər ortaya qoymasını tələb edir.
Vəkil bildirib ki, Fətullayev tələbləri yerinə yetirilənədək aksiyanı davam etdirməkdə israrlıdır.
Vəkil həmçinin baş redaktorun səhhəti ilə bağlı problemi olmadığını, ona cəza çəkdiyi 12 saylı müəssisədə müxalifət yönümlü qəzetlərin verilmədiyini, görüşlərə məhdudiyyət qoyulduğunu deyib.
Fətullayevə dəstək məqsədilə bu gün "Gündəlik Azərbaycan" qəzetinin redaktoru Şahvələd Çobanoğlu da aclıq aksiyasına başlayıb.
Ədliyyə Nazirliyinin Penitensiar Xidmətindən iş günü olmadığından məlumat almaq mümkün olmayıb.
Fətullayev Cinayət Məcəlləsinin terrorçuluqla hədələmə (214.1-ci), qulluq mövqeyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma (213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib.
Azərbaycanda peşə fəaliyyəti ilə bağlı 3 jurnalist həbsdədir.