Azərbaycan, Bakı, 17 aprel / Trend , müxbir K.Zərbalıyeva/ Ömürlük azadlıqdan məhrum edilmiş DİN-in sabiq baş əməliyyat müvəkkili həyatı ilə bağlı kitab yazır.
Bu barədə cümə günü Trend a məlumat verən Azərbaycan İşgəncələr Əleyhinə Komitəsinin sədri Elçin Behbudov məlumat verib.
Komitə sədri bildirib ki, cümə günü MTN-in İstintaq Təcridxanasında saxlanılan sabiq əməliyyat müvəkkli Hacı Məmmədov, sabiq iqtisadi inkişaf naziri Fərhad Əliyev və "Azal" Hava Yolları Konserninin İctimai Təhlükəsizlik Xidmətinin sabiq rəisi Emil Süleymanovla görüşüb.
Behbudov bildirib ki, Məmmədov həyatından bəhs edən kitabı ilin sonunadək tamamlayacaq.
Hər üç şəxs saxlanmadan və onlara olan münasibətdən şikayətçi olmayıb.
Sabiq nazir Əliyev isə Müalicə Müəssisəsində keçdiyi tibbi müayinənin nəticələri ilə tanış olmaq və qardaşı, "Azpetrol" Şirkətlər Qrupunun sabiq prezidenti Rafiq Əliyevlə görüş istəyib. Sabiq nazir səhhətinin normal olduğunu bildirib.
Behbudov onun xahişini təcridxana rəhbərliyinə çatdırdığını deyib.
Məmmədov çoxsaylı qətllərdə, adam oğurluqlarında təqsirli bilinərək ömürlük azadlıqdan məhrum edilib.
Əliyev korrupsiya cinayətlərində təqsirli bilinərək 10 il müddətinə azadlıqdan məhrum edilib.
Süleymanov isə dövlətə xəyanətdə təqsirli bilinir. Onun məhkəmə prosesi hələ davam edir.
Məqalənin müəllifi ilə [email protected] ünvanı ilə əlaqə saxlaya bilərsiniz
