Azərbaycan, Bakı, 10 may /müx.TrendLife Şahin Cavadsoy/
"Lider TV" də böyük maraqla izlənilən "Azəri Star-2008" gənc ifaçıların mahnı müsabiqəsinin ücüncü həftəsi də maraqlı məqamlarıyla yadda qaldı. Şəmkir rayonundan çəkilən bayram konsertinin yayımlanması ilə əlaqədar efirə 22:35-də çıxan müsabiqə, bu dəfə də "Fləş" rəqs qrupunun nömrəsi ilə başladı. Daha sonra yarışmanın aparıcıları-Kemal Cenk İçten və Aygün Məcid ötən həftə münsiflər tərəfindən toxunulmazlıq qazanan iştirakçı Şahnaz Əliyevanı səhnəyə dəvət etdilər. Məlumunuz olsun ki, "Azəri Star-2008"adı uğrunda mübarizə aparan 18 iştirakçının hər biri həm 9 may Qələbə günü, həm də ümummilli lider Heydər Əliyev 85 illik yubileyi ilə əlaqədar vətənpərvərlik mövzusunda yazılan mahnılar ifa etdilər. Müslüm Maqomayev, Tofiq Quliyev, Zeynəb Xanlarova, Rauf Hacıyev, Eldar Mansurov, Etibar Qasımbəyli və digər bəstəkarların əsərlərini səsləndirən iştirakçılar, münsiflərdən xoş sözlər eşitdilər. Dəyişən münsiflər heyətinin tərkibində isə xalq artisti-aktrisa Elmira Şabanova; əməkdar incəsənət xadimi-bəstəkar Nailə Mirməmmədli; müğənnilər - İlqar Xəyal və Röya Ayxan daxil idi. İştirakçıların çıxışlarını ümumilikdə qənaətbəxş hesab edən dörd münsif, daha çox onların qəlblərini qırmamağa çalışdılar.
Həmişə maraqlı zarafatlarıyla yadda qalan müğənni Röya Ayxan, bu dəfə də ənənəsinə xilaf çıxmadı. "Azəri Star" adının düşərli olmasından bəh-bəhlə danışan müğənni, ərə getmək məsələsini növbəti dəfə gündəmə gətirdi: "Bu müsabiqəyə aparıcılıq edən xanımlar, efirə çıxandan sonra tez müddətdə ərə gedirlər. Mənim Valeh adlı dostum var. Bəlkə, şirin çay içib, onu gözəl aparıcımız Aygünlə nişanlayaq?" Bu məqamda söz alıb danışan İlaq Xəyal, həmin sualı dolayısıyla Röyanın özünə ünvanladı: "Cenk bəy də yaraşıqlıdı. Bəlkə, səni də onunla nişanlayaq?" Söhbətə müdaxilə edən Cenk İçten canlı efirdicə bəyan etdi ki, ailəlidir və iki uşaq atasıdır. Məsələnin böyüdüyünü görən Röya, yenidən söhbətə qarışdı: "Bəli, Cenk bəyin çox gözəl ailəsi var. Allah hamıya bu cür ailə qismət etsin".
Ailə söz-söhbəti bitəndən sonra iştirakçılar yenidən növbə ilə hazırladıqları mahnıları ifa etməyə davam etdilər.
Şənbə günlərinin həlledici olduğunu nəzərə alıb, təkrarən 18 iştirakçının adlarına açılmış SMS nömrələrini diqqətinizə təqdim edirik. Bəyəndiyiniz iştirakçılar varsa, onları yalnız Bakcell nömrələrindən göndərəcəyiniz SMS-lərlə dəstəkləyə bilərsiniz:
1.İlkin Əhmədov 500 10 70
2.Kənan Əzimov 500 10 71
3.Sədaqət Əhmədova 500 10 72
4.Elçin Məmmədov 500 10 73
5.Elçin Şərifzadə 500 10 75
6.Şahnaz Əliyeva 500 10 76
7.Tərlan Musayev 500 10 77
8.Şəms Cəbiyeva 500 10 78
9.Rinat Aslanov 500 10 79
10.Mirsaleh Əliyev 500 10 81
11.Günay Şıxəliyeva 500 10 82
12.Arif Əmrahzadə 500 10 83
13.Yaqut Nərimanova 500 10 84
14.Ədalət Abbasov 500 10 85
15.Aybəniz Məmmədova 500 10 86
16.Fəxri Kazım-Nicat 500 10 87
17.Hüseyn Abdullayev 500 10 88
18.Ruslan Süleymanov 500 10 89