Bakı. Trend:
Belçika hakimiyyəti bazar günü Brüsseldəki məscidin fasadında svastika aşkar edildikdən sonra araşdırmaya başlanıldığını açıqlayıb.
“Məscidə hücum etmək, müsəlman həmvətənlərimizi onların dini və kimliyi ilə bağlı ən həssas nöqtədən hədəfə almaq deməkdir”, — daxili işlər naziri Bernar Kinten X sosial şəbəkəsində bildirib.
“Bu iyrənc əməlin qarşısında məscidin dindarlarına və Belçikanın bütün müsəlman icmasına tam dəstəyimizi ifadə edirik. Biz torpaqlarımızda islamofobiyaya, irqçiliyə və antisemitizmə heç vaxt dözməyəcəyik. Polis hadisəni törədən şəxsləri müəyyən etmək üçün araşdırma aparır. Ədalət nümunəvi olmalıdır”, — o vurğulayıb.
Yazı şənbə günündən bazara keçən gecə Brüsselin Laeken rayonunda yerləşən Əl-Müvahidin məscidinin fasadında aşkar edilib.
“Hadisəni törədən şəxslərin qısa müddətdə müəyyən edilməsi məqsədilə araşdırma aparılır”, — rayon meri Filip Klouz (Sosialist Partiyası) bildirib.
1980-ci ildə əsası qoyulan Əl-Müvahidin Brüsselin tarixi məscidlərindən biridir.
