Azərbaycan, Bakı,29 iyul / Trend , müxbir K.Zərbalıyeva/ Məhkumların cəza çəkdiyi müəssisə barəsində yalnız onların razılığı ilə məlumat almaq mümkün olacaq.
"Cəzaların İcrası və Cinayət-Prosessual məcəllələrinə əlavə və dəyişikliklərin edilməsi haqqında" yeni qanunun tələblərinə görə, məhkumun köçürüldüyü cəzaçəkmə müəssisəsi, onun yerinin dəyişdirilməsi ilə bağlı məlumatlar məhkumların razılığı olduğu halda ailəsinə və yaxın qohumlarına verilə bilər.
Ədliyyə Nazirliyi Cəzaların İcrasına Nəzarət üzrə Müfəttişliyin rəhbəri Malik Ələkbərov çərşənbə axşamı Trend -a bildirib ki, əvvəlki qanuna görə, müəssisə rəhbərliyi məhkumun cəza çəkdiyi yer barədə onun ailəsinə və yaxın qohumlarına mütləq məlumat verməliydi.
"Qanuna edilən dəyişikliklərdən sonra bu tələb aradan qaldırılıb. Elə məhkum var ki, o, məhkumluğu, ittiham olunduğu cinayətlər, cəza çəkdiyi müəssisə barədə başqalarının xəbərdar olmasını istəmir", - deyə Ələkbərov vurğulayıb.
Müfəttişliyin rəisi deyib ki, Avropa Penitensiar Qaydalarına uyğun olaraq, Azərbaycan qanunvericiliyinə belə bir dəyişiklik olunub. Məhkumun razılığı yazılı və şifahi formada ola bilər.
Nazirlik rəsmisinin sözlərinə görə, dövlətlərin və rəsmi orqanların müraciətləri əsasında məhkum haqqında məlumatlar tələb olunarsa, həmin məlumatların verilməsi üçün məhkumun razılığı tələb olunmur.
Penitensiar Xidmətin ictimaiyyətlə əlaqələr mərkəzindən bildirilib ki, bundan sonra qanunun tələbinə müvafiq olaraq mətbuata məhkumlar barəsində məlumatlar yalnız onların razılığı olduqda veriləcək.
Qanunda məhkumların təhsil almaq hüququnun genişləndirilməsi, yazışmalarda senzuranın məhdudlaşdırılması, əməklə məşğul olan məhkumların əmək haqlarından tutulmaların azaldılması,onların maddi-məişət təminatlarının dövlət tərəfindən ödənilməsi, ömürlük azadlıqdan məhrum edilmiş məhkumlar üçün əlavə güzəştlərin müəyyən olunması nəzərdə tutulub.
Azərbaycan Respublikası prezidentinin qanunvericilik təşəbbüsü ilə iyunun 24-də Milli Məclis tərəfindən cəzaların çəkilməsi və icrası qaydalarının humanistləşdirilməsi ilə bağlı "Cəzaların İcrası və Cinayət-Prosessual məcəllələrinə əlavə və dəyişikliklərin edilməsi haqqında" Qanun qəbul edilib.
Müəlliflə əlaqə saxlamaq üçün elektron ünvan - [email protected]
