Azərbaycan, Bakı, 19 sentyabr / Trend , müxbir S.Kazımlı / Bakının Yasamal rayonunun Hüseyn Cavid, Şəfayət Mehdiyev və Landau küçələrinin kəsişməsində yerləşən 546-cı məhəlləsindəki qəzalı vəziyyətdə olduğu bildirilən (metronun "Elmlər Akademiyası" stansiyasının yaxınlığında yerləşən) binanın sakinləri Bakı şəhər İcra Hakimiyyətinin başçısı Hacıbala Abutalıbovla görüşüblər.
Bu barədə çümə günü Trend -a məlumat verən sakinlər bildiriblər ki, görüşdə Abutalıbov deyib ki, yaşayış kompleksi ilə bağlı Nazırlər Kabinetinin sərəncamı hazırlanıb: "Abutalıbov bildirdi ki, yaxın günlərdə sərəncam icra edilməsi üçün Bakı şəhər İcra Hakimiyyətinə göndəriləcək".
Trend -un arayışı: Bu ilin iyul ayının 19-da sakinlərlə görüşən Yasamal rayonundakı 21 saylı Mənzil İstismar Sahəsinin rəisi Laçın Hacıyev Nazirlər Kabinetinin möhürü ilə təsdiqlənmiş sərəncamı sakinlərin diqqətinə çatdırıb. Sərəncamda göstərilib ki, Bakı şəhəri, Yasamal rayonu, akademik Şəfayət Mehdiyev küçəsi, 546-cı məhəllə, 17 ünvanında beşmərtəbəli yaşayış binasının təhlükəli vəziyyətdə olan mənzillərində yaşayan əhalinin təhlükəsizliyinin təmin olunması üçün onların digər ünvanlarda mənzil kirayələyib müvəqqəti yerləşməsi məqsədilə 36 ailənin rayon ərazisində digər ünvanlarda yerləşməsi üçün tələb olunan 6 aylıq kirayə haqları və köçürülmə xərclərinin ödənilməsi üçün 130560 manat ayrılması nəzərdə tutulur. 1 otaqlı mənzil sahiblərinə 400 manat, 2 otaqlılar üçün 500 manat, 3 otaqlı mənzil sahibləri üçün 700 manat, habelə vətəndaşların köçürülmə xərcləri üçün 1 avtoreysə görə 120 manat vəsait ödəniləcək. Sərəncamda sakinlərin yaşadıqları binanın sökülüb-sökülməməsi və yaxud da təmiri ilə bağlı heç nə öz əksini tapmayıb.
Həmin ərəfədə sakinləri qəbul edən Baş nazirin müavini Abid Şərifov onlara binanın söküləcəyini deyib. Şərifov binanın 5, 6, 7-ci bloklarının, sonrakı mərhələdə isə binanın digər 7 blokunun da söküləcəyini söyləyib. Baş nazirin müavini sakinlərə bildirib ki, gələcəkdə həmin ərazidə tikilən binada sakinlərə indiki mənzil sahələrindən 20 faiz artıq mənzillər veriləcək.
Bina 1959-cu ilin aprel ayından tikilməyə başlanılıb, 1960-cı ildə isə istifadəyə verilib. Həmin ildən binada Bakı Dövlət Universitetinin və Milli Elmlər Akademiyasinin professor, alim və dosentləri yaşamağa başlayıblar.
Bu il iyun ayının 19-da gecə saatlarında bir qrup polis əməkdaşı binaya daxil olaraq 5, 6 və 7-ci bloklarda yaşayan 40 ailəni mənzillərdən çıxarıblar. Həmin gündən qeyd olunan bloklardakı mənzillərə verilən qaz, su və elektrik enerjisi kəsilib. Binanın təxminən 40-dan artıq eyvanı sökülüb.
Bundan əlavə sakinlər Nazirlər Kabinetinin 18 iyul 2008-ci il tarixlı sərəncamının ləğv edilməsi tələbi ilə, həmçinin, sakinləri qanunsuz olaraq mənzillərindən çıxartdıqları üçün Yasamal rayon İcra Hakimiyyəti və Fövqəladə Hallar Nazirliyi əməkdaşlarından məhkəməyə müraciət ediblər. Sakinlər həmin məhkəmə iddiasinda Dövlət Arxitektura Komitəsini də məhkəməyə veriblər. Sentyabrın 8-də sakinlərin iddiaları üzə Yasamal rayon məhkəməsində hazırlıq iclası keçirilib. Sentyabrın 8-də hakim onların iddiaları ilə bağlı Konstitusiya Məhkəməsinə sorğu göndərildiyini elan edib . Hakim bildirib ki, Nazirlər Kabinetinin sərəncamı ilə bağlı iddialara rayon məhkəmələrində baxıla bilməz. Bu səbəbdən də hakim məsələyə hansı məhkəmədə baxılacağını müəyyənləşdirmək üçün qeyd olunan məhkəməyə sorğu göndərib.
Sakinlərin sözlərinə görə, Abutalıbov da binanın sökülüb yerində 18 mərtəbəli yaşayış binasının tikiləcəyini və sakinlərə kirayədə yaşamaq üçün pul veriləcəyini deyib.
Bina söküləndən sonra sakinlərə mənzillərin verilməsinə gəlincə, Abutalıbov bu işin Nazirlər Kabinetinin və Fövqəladə Hallar Nazirliyinin səlahiyyətində olduğunu qeyd edib.
Məqalə müəllifi ilə əlaqə ünvanı: [email protected]
