Azərbaycan, Bakı, 18 dekabr / Trend , müxbir K.Zərbalıyeva/ Avropa Məhkəməsi cümə axşamı fikir və ifadə azadlığının pozulmasına görə Azərbaycana qarşı qərarını elan edib.
Avropa İnsan haqları Məhkəməsinin cümə axşamı elan etdiyi qərara görə, Azərbaycan hökuməti "Müxalifət" qəzetinin baş redaktoru Rövşən Kəbirliyə (Mahmudov) və əməkdaşı Yaşar Ağazadəyə birlikdə dəymiş mənəvi ziyana görə 1000, məhkəmə xərcləri üçün 925 avro məbləğində kompensasiya ödəməlidir.
Şikayətçilər Avropa Məhkəməsinə ünvanladığı şikayətdə onların Konvensiyanın 10 - cu maddəsi (fikir və ifadə azadlığı) ilə qorunan hüquqlarının pozuntusu ilə bağlı iddialarını bildiriblər. Məhkəmə qərarında qeyd edib ki, Cəlal Əliyev ictimaiyyət tərəfindən kifayət qədər tanındığı üçün, belə tənqidlərə dözümlülük nümayiş etdirməli idi.
Məhkəmə mübahisəyə səbəb olmuş "Azərbaycanda taxıl mafiyası"adlı yazının faktlar əsasında yazılmadığını və bununla da jurnalistlərin jurnalist etikasını pozmasını da sənəddə vurğulayıb.
Millət vəkili Cəlal Əliyevin xüsusi ittiham qaydasında şikayəti üzrə, jurnalistlər Cinayət Məcəlləsinin 147.2-ci (ağır və xüsusilə ağır cinayətdə ittiham etməklə böhtan atma) maddəsi ilə təqsirli bilinərək, Yasamal rayon məhkəməsinin 20 may 2003-cü il tarixli hökmü ilə 5 ay müddətinə azadlıqdan məhrum ediliblər. Amnistiya aktı tətbiq ediləndən sonra azadlığa buraxılıblar.
Kəbirli və Ağazadə eyni ittihamla millət vəkili Cəlal Əliyevin iddiası üzrə 2007- ci il aprelin16 - da 2 il 6 ay müddətinə azadlıqdan mıəhrum olunublar. Jurnalistlər bu iş üzrə də Avropa Məhkəməsinə şikayət ediblər.
Bu, Azərbaycana qarşı Avropa Məhkəməsi tərəfindən çıxarılan 15 - ci qərardır.
Məqalə müəllifi ilə əlaqə ünvanı:[email protected]