Azərbaycan, Bakı, 12 mart / Trend , müxbir K.Zərbalıyeva /
Azərbaycan dövləti ilə Avropa İnsan Hüquqları Məhkəməsi arasında 48 işlə bağlı kommunikasiya aparılır. Bu barədə cümə axşamı Trend -a Hüquq Maarifçiliyi Cəmiyyətindən məlumat verilib.
Həmin işlər İnsan hüquqlarının və əsas azadlıqların müdafiəsi haqqında Konvensiyanın müxtəlif maddələrinin pozuntusu ilə bağlıdır.
Şikayətlərdən 11-i işgəncələrin qadağan olunması (3-cü), 8-i azadlıq və toxunulmazlıq hüququ (5-ci), 40-ı ədalətli məhkəmə araşdırması hüququ (6-cı), 4-ü qanunsuz cəzalandırılmamaq (7-ci), 6-sı şəxsi və ailə həyatına hörmət hüququ (8-ci), 15-i fikir, vicdan və din azadlığı (9-cu), 11-i fikir ifadə etmək hüququ (10-cu), 2-si yığıncaqlar və birləşmək azadlığı (11-ci), 34-ü səmərəli hüquqi müdafiə vasitələri hüququ (13-cü), 37-si ayrı-seçkiliyin qadağan olunması (14-cü), 19-u Konvensiyanın 1 saylı Protokolunun mülkiyyətin müdafiə olunması (1-ci) pozuntusu ilə bağlıdır.
Kommunikasiyada olan işlər arasında 2005-ci ilin Parlament seçkiləri ilə bağlı Konvensiyanın 1 saylı Protokolunun 3-cü maddəsinin (azad seçki hüququ) pozuntusundan verilən 19 şikayət var.
Ermənistanın vətəndaşları S.Arakelyan və M.Sargsyan tərəfindən verilən şikayətlər də kommunikasiya mərhələsindədir.
