Azərbaycan, Bakı, 31 mart / Trend , müxbir N.Abdullayev /
1918-ci ildə martın 31-də baş vermiş soyqırım qurbanlarının xatirəsi Rumıniyada yad edilib. Rumıniyadakı Azərbaycan səfirliyində Heydər Əliyev fondunun təşəbbüsü ilə bu faciənin 91 illiyinə həsr olunmuş tədbir həyata keçirilib.
1918-ci ilin mart ayında hakimiyyəti ələ keçirmiş daşnaklar Stepan Şaumyanın rəhbərliyi altında Azərbaycan xalqına qarşı amansız soyqırım törədiblər.
Mart-aprel aylarında Bakı, Şamaxı və digər bölgələrdə on minlərlə günahsız azərbaycanlı amansızcasına qətlə yetirilib. O zaman qardaş Türkiyə (Osmanlı İmperiyası) Azərbaycana yardım əlini uzadıb və bununla azərbaycanlılar ermənilər tərəfindən törədilən kütləvi soyqırımdan xilas olublar.
Ümummilli lider Heydər Əliyevin 1998-ci ildə imzaladığı fərmana əsasən, 31 mart azərbaycanlıların Soyqırımı Günü kimi qeyd edilir.
Azərbaycanın Rumıniyadakı səfiri Eldar Həsənov 1905-1907-ci illərdə baş vermiş erməni təcavüzü, Dağlıq Qarabağın işğalı, Xocalı hadisələri barədə danışıb.
Tədbirdə Rumıniya-Azərbaycan Dostluq Cəmiyyətinin nümayəndələri, Azərbaycan-Rumıniya Mədəniyyət Gənclər Assosiasiyası, Ticarət Palatası və SOCAR-ın nümayəndələri iştirak edib.
Həmçinin tədbirdə sərgi təşkil olunub.
Azərbaycanın Rumıniyadakı səfirliyi tədbirin yekunları üzrə parlamentə, QHT və bu ölkədə yerləşən diplomatik missiyalara press-reliz göndərib.
Məqalə müəllifi ilə əlaqə ünvanı: [email protected]