...

Azərbaycanın şimal-qərbində şabalıd ağaclarının məhv olmaq təhlükəsi var

Cəmiyyət Materials 1 Aprel 2009 16:36 (UTC +04:00)

Azərbaycan, Səki, 01 aprel / Trend , müxbir X.Əliyeva /

Azərbaycanın şimal-qərb bölgəsində Şəki, Qax , Zaqatala və Balakən rayonlarında qiymətli növ olan şabalıd ağaclarına kütləvi xəstəlik yayılıb. 

9 saylı Ərazi Ekologiya İdarəsinin sektor müdiri Zakir Əliyev çərşənbə günü Trend -a bildirib ki, şabalıd ağaclarının quruması həmin növə məxsus olan "Holland" xəstəliyinin bölgədə yayılması səbəbindən baş verir.

"200, 300-400 il yaşı olan ağaclarla yanaşı, cavan ağaclar da bu xəstəliyin yoluxmasına məruz qalır",-sektor müdiri vurğulayıb.

Əliyevin sözlərinə görə, bu xəstəliyin sirayət etdiyi ağaclarda kök sisteminin torpaqdan götürdüyü qida maddələrini gövdə, budaq və çətirə çatdıran qabıq altında yerləşən nazik borular yararsız vəziyyətə düşür. Qida çatmadığına görə ağac çətir-uc hissəsindən qurumağa başlayır və bu quruma tədricən gövdəyə doğru gedir.

Mütəxəssislər güman edir ki, bu xəstəliyi törədən viruslar ağacın gövdəsində olan həmin boruların daxilində məskunlaşaraq yaşayır. Həmin virusun isə hava, külək vasitəsilə yayılması güman olunur.

Xəstəliyin qarşısının alınması ancaq sanitar qırıntı aparılması ilə mümkündür. Holland virusuna düçar olan ağacların digər xəstəlik və ziyanvericilərə qarşı müqaviməti də zəifləyir.

Qiymətli material kimi istifadə olunan şabalıd ağacları içlik qabiliyyətini də itirir ki, ondan ancaq oduncaq kimi istifadə edilir. 

Hazırda bölgədə həyətyanı sahələr və Dövlət Meşə Fonduna məxsus ərazilərdəki ağacların əksəriyyətində bu xəstəliyin yayılması kütləvi hal alıb.

Mütəxəssislərin sözlərinə görə, artıq bölgədə minlərlə qiymətli növ olan şabalıd ağacı bu təhlükə ilə üz-üzədir. Yaranmış vəziyyət isə həmin ağaclarin tamamilə məhv olmasına gətirib çıxara bilər ki, bu da həyəcan təbili çalmağa əsas verir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti