Azərbaycanın cənub zonasında xaricdə təhsil alan tələbələrimizin gətirdiyi zərərli dini kitablar müsadirə edilib
Azərbaycan, Lənkəran, 14 may / Trend , müxbir P.Əliyeva / Azərbaycanın cənub zonasında (Lənkəran, Astara, Masallı, Lerik, Biləsuvar, Cəlilabad, Yardımlı) xaricdə təhsil alan tələbələrimizin ölkəmizə gətirdiyi yayımı qadağan olunan zərərli dini kitablar müsadirə edilib.
"Son bir ayda Biləsuvar və Astara gömrük məntəqələrində xaricdə təhsil alan tələbələrimizin gətirdiyi kitablar arasında yayımı qadağan olunan dini kitablar aşkarlanıb", - cümə axşamı Trend -a Dini Qurumlarla İş üzrə Dövlət Komitəsinin Cənub zonası üzrə şöbə müdiri Miryəhya Bəbirov bildirib.
Trend -un arayışı: Dövlət Komitəsində yayımı qadağan olunan dini kitabları müəyyənləşdirmək üçün ekspertiza şöbəsi fəaliyyət göstərir.
Azərbaycanda 2008-ci ildə dini dözümsüzlüyü və ayrı-seçkiliyi təbliğ edən 59 adda kitabın ölkəyə idxalının və yayılmasının qarşısı alınıb.
Dini Qurumlarla İş üzrə Dövlət Komitəsindən öncə bildirilib ki, əvvəlki illərin statistikasının təhlili son vaxtlar ölkəyə zərərli dini ədəbiyyatın idxalının və yayılmasının azaldığını göstərir. Bu faktı Komitədə ekspertizadan keçirilən dini kitabların arasındakı zərərli dini ədəbiyyatın sayı da təsdiqləyir.
Ötən il 102 dini icma dövlət qeydiyyatından keçib və beləliklə ölkədə fəaliyyət göstərən dini qurumların sayı 533-ə çatıb.
2008-ci ildə qeydiyyata alınan dini icmaların 101-i islam, biri isə qeyri-islam təmayüllü, Sumqayıt şəhərində fəaliyyət göstərən "Kübar" yəhudilər dini icmasıdır.
Bəbirov deyib ki, tələbələr arasında aşkar olunan zərərli dini kitablar əsasən ərəb, fars və rus dillərindədir. Onun sözlərinə görə, əvvəlki illərə nisbətən xaricdən Azərbaycana gətirilən zərərli dini kitabların sayı 60 faiz azalıb. Bu da dini maarifləndirmənin və mübarizənin gücləndirilməsinin nəticəsidir.
Şöbə müdiri deyib ki, Cənub zonasında vəhabilər və "Yahova şahidləri" dini sektasının daşıyıcıları var. Lakin onların aktiv fəaliyyətinin qarşısı alınıb.
İndiyə qədər şöbə üzrə 133 dini icma qeydiyyatdan kecirilib, 15-ə yaxın icmanın qeydiyyatı üçün sənədlər hazırlanır.
