Azərbaycan, Bakı, 08 iyun / Trend , müxbir C.Babayeva /
Gürcüstanda yaşayan azərbaycanlılar mərkəzləşmiş şəkildə təşkilatlanmanın tərəfdarıdırlar.
"Gürcüstan azərbaycanlılarının qeyri-hökumət təşkilatları arasında əlaqələr çox zəifdir. Vacib məsələlərin həllində, problemləri ölkə və ya dünya səviyyəsinə qaldırmaq üçün ayrı-ayrı təşkilatlardan təzadlı fikirlər ortaya çıxır. Gürcüstan azərbaycanlılarının təşkilatlanmaya ehtiyacı var", - bazar ertəsi Trend -a Tbilisidən telefonla Gürcüstan azərbaycanlılarının "Qeyrət" Xalq Hərəkatının sədri Əlibala Əsgərov bildirib.
Trend -un arayışı: Gürcüstanda fəaliyyət göstərən azərbaycanlıların qeyri-hökumət təşkilatlarının qeyri-rəsmi məlumatlarına görə, ölkədə əsasən Kvemo-Kartli rayonunda (Borçalı) təxminən 500 min azərbaycanlı yaşayır.
Gürcüstan azərbaycanlıları dövlət dilinin öyrənilməsi, doğma dildə təhsil, torpaq sahələrinin alınması və onlara dövlət orqanlarında yüksək vəzifələrin verilməməsi ilə bağlı problemlərdən şikayətlənirlər.
Əsgərov azərbaycanlıların ictimai fəaliyyətlə məşğul olan təşkilatlarının əlaqələndirmə mərkəzinin yaradılmasının tərəfdarı olduğunu bildirib.
"Mərkəz ölkə əhəmiyyətli məsələlər ortaya çıxanda vahid mövqe nümayiş etdirə bilər", - o deyib.
Əsgərovun sözlərinə görə, Gürcüstan azərbaycanlılarının təşkilatlanma məsələsi 1993-cü ildən gündəmdədir və zaman-zaman bu məsəslə qaldırılıb.
"Azərbaycanlıların ümumrespublika qurultayının çağırılması ilə bağlı təşəbbüs irəli sürmüşdük. Təəssüf ki, bu günə qədər ayrı-ayrı bölgələrdə fəaliyyət göstərən ictimai tışkilatların birliyi əldə olunmayıb", - hərəkatın sədri bildirib.
Əsgərov deyib ki, azərbaycanlıların yaşadıqları Gürcüstanın 13 rayonu və Tbilisidə bir sıra qeyri-hökumət təşkilatları fəaliyyət göstərir. "Gürcüstanda azərbaycanlıların təşkilatlanması ermənilərə nisbətən zəifdir. Bunun əsas səbəblərindən biri ictimai təşkilatlar arasında "mənəm-mənəmliy"in olmasıdır. Gürcüstanda güclü qeyri-gürcü təşkilatın yaranması hakimiyyətin maraqlarına uyğun gəlmir", - o bildirib.
"Gürcüstan Azərbaycanlıları Konqresi yaradılanda əsas məqsəd azərbaycanlıların təşkilatlanmasına nail olmaq olub. Konqres yaradılarkən azərbaycanlıların bütün qeyri-hökumət təşkilatlarının nümayəndələri ilə görüşüb, onları da konqresə dəvət etmişik", - bazar ertəsi Trend -a Tbilisidən telefonla Gürcüstan Azərbaycanlıları Konqresinin (GAK) sədri Əli Babayev bildirib.
Babayev deyib ki, Gürcüstan azərbaycanlılarının yaratdıqları bəzi qeyri-hökumət təşkilatlarının qeydiyyatı olsa da, heç bir fəaliyyətlə məşğul olmurlar.
"Təəssüflər olsun ki, bəzi ictimai təşkilatlar Azərbaycan mətbuatında çıxışlar edirlər, amma əslində Gürcüstanda heç bir fəliyyət göstərmirlər", - GAK sədri deyib.
O bildirib ki, Gürcüstan azərbaycanlılarının ən təşkilatlı və böyük qeyri-hökumət təşkilatı olan Gürcüstan Azərbaycanlıları Konqresi cəmiyyətdə tanınır. "Konqres azərbaycanlıların problemlərinin həlli, hüquqlarının təmin olunması məqsədilə layihələr həyata keçirir", - Babayev deyib.
Məqalə müəllifi ilə əlaqə ünvanı: [email protected]
