Azərbaycan, Bakı, 06 avqust / Trend , muxbir H.Bağırov /
Azərbaycan Ordusunun dövlətə xəyanətdə ittiham olunan bir qrup hərbçisinin cinayət işi üzrə məhkəmə prosesi başa çatıb. Ağır Cinayətlərə Dair İşlər üzrə Hərbi Məhkəmədən cümə axşamı Trend -a verilən məlumata görə, məhkəmənin hökmü ilə Xaqani Cavadov 15, Elçin Məmmədov 15, Süleyman Əliyev 12 və Samir Tağıyev 12 il müddətinə azadlıqdan məhrum ediliblər. Rəşad Abışov isə 2 il müddətinə islah işləri cəzasına məhkum edilib.
Müdafiə Nazirliyinin Gədəbəy rayonunda yerləşən "N" saylı hərbi hissənin zabiti, leytenant Xaqani Bəkir oğlu Cavadov, kiçık çavuşlar Elçin İbad oğlu Məmmədov, Samir Müxlis oğlu Tağıyev və əsgər Süleyman Lətifşah oğlu Əliyev ötən ilin oktyabrın 18-də həbs olunublar.
Xaqani Cavadov bir qrup şəxslə əlbir olaraq qulluq mövqeyindən istifadə etməklə tabeliklərində olan əsgərləri zorlayıb və ermənilərin xeyrinə casusluğa cəlb edib. Ermənilər də həmin əsgərlərdən istifadə edərək ordumuzun mövqeləri barədə məlumat almaqla yanaşı, onların vasitəsilə Azərbaycan ərazisində partlayışlar törətməyi planlaşdırıblar.
Onlar Cinayət Məcəlləsinin seksual xarakterli zorakılıq hərəkətləri etmə (150-ci), qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə (228-ci), dövlətə xəyanət (274-cü), hərbi hissəni və ya xidmət yerini özbaşına tərk etmə (333-cü), döyüş növbəsi çəkmə qaydalarını pozma (338-ci), hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə (341-ci), hərbi əmlakı qəsdən məhv etmə və ya zədələmə (349-cu) maddələri ilə təqsirləndiriliblər.
Məqalə müəllifi ilə əlaqə ünvanı: [email protected]
