Azərbaycan, Bakı, 14 avqust / Trend , müxbir H. Bağırov /
"Azərbaycan Hava Yolları"na (AZAL) məxsus biletlərin ucuz qiymətə qanunsuz yolla satışı ilə məşğul olan əcnəbilərdən və azərbaycanlılardan ibarət dəstənin məhkəməsi başlayıb.
Ağır Cinayətlərə Dair İşlər üzrə Məhkəmədən cümə günü Trend -a verilən məlumata görə, dəstə üzvlərinin işi üzrə hazırlıq iclasında növbəti məhkəmə prosesi avqustun 17-nə təyin olunub.
Dəstə üzvləri "AZAL"ın rəsmi www.azal.az internet səhifəsinə daxil olmaqla ABŞ və digər xarici ölkə vətəndaşlarının kredit kartlarından gizli istifadə edərək, onların bank hesablarından elektron avia-biletlərin dəyərini ödəməklə əldə edib və həmin biletləri ucuz qiymətə, nağd pula müxtəlif şəxslərə satıblar.
Azərbaycan vətəndaşları - Şəmsəddin Abdurrəhmanov, Vaqif Mirzəzadə, Tahir Əmirquliyev, Elyar Qocazadə, Nazim Həsənov, Əhliman Məmmədov, Murad Mahmudov, Ata Abdullayev, Səidə Məmmədova, Nigeriya vətəndaşı Mutiu Olovu və qeyrilərindən ibarət transmilli dəstənin əməlləri "AZAL"ın işinin pozulmasına səbəb olub və bunun nəticəsində şirkətə 100 min manata yaxın zərər vurulub.
Təqsirləndirilən şəxslər Cinayət Məcəlləsinin mütəşəkkil dəstə tərəfindən kompüter informasiyasına qanunsuz daxilolma ilə külli miqdarda ziyanvurma (271.2.1-ci və 271.2.3-cü), mütəşəkkil dəstə tərəfindən özgənin külli miqdar əmlakını gizli talama (177.3.1-ci və 177.3.2-ci) maddələri ilə ittiham olunurlar.
Məqalə müəllifi ilə əlaqə ünvanı: [email protected]