Azərbaycan, Bakı, 4 may /Trend, müxbir H.Bağırov/
Azərbaycan Dövlət Neft Akademiyasında ötən ilin aprelində törədilmiş terror aktı ilə bağlı çərşənbə axşamı keçirilən məhkəmə iclasında zərərçəkənlər ifadə veriblər.
Trend-in məlumatına görə, bu gün Ağır Cinayətlərə Dair İşlər Üzrə Məhkəmədə akademiyanın müəlliməsi Vəfa Axundova ifadəsində deyib ki, hadisə zamanı imtahandaydı.
"Dəhlizdən səs gəldi, çölə çıxanda bir oğlanın ora-bura qaçdığını gördüm və ondan tələb etdim ki, imtahan getdiyi üçün sakitliyə riayət etsin. Həmin oğlan əlindəki silahla mənə iki dəfə atəş açmaq istəsə də, silahında güllə olmadığından sağ qalmişam", - Axundova deyib.
Axundova həmin şəxsin telekanallarda göstərilən Fərda Qədirov olduğunu təsdiq edib.
Prosesdə zərərçəkmişlərin ifadələri başa çatıb.
Təqsirləndirilənlər ifadə verib və özlərini təqsirli saymayıblar. Onlar telekanalların prosesdə iştirakını tələb edib və yalnız bu halda ifadə verəcəklərini söyləyiblər.
Prokuror Abdulla Yusifov onların bu addımının məhkəmə prosesini uzatmaq məqsədi güddüyünü deyib.
Hakim Tamella Allahverdiyeva isə prosesin açıq aparıldığını, KİV nümayəndələrinin prosesdə iştirak etdiyini bildirib və deyib ki, istənilən telekanal prosesi işıqlandıra bilər, onlara bununla bağlı qadağa qoyulmayıb.
Azərbaycan Dövlət Neft Akademiyasında ötən ilin aprelində törədilmiş terror aktını sifariş vermiş erməni barəsində beynəlxalq axtarış elan olunub. Dövlət ittihamçısı Yusif Abdullayev bu barədə ötən prosesdə məlumat verib. O bildirib ki, cinayətin sifarişçisi, erməni Martin Qumaşyan barəsində cinayət işi ayrı icraatda aparılır və həmin şəxs İnterpol vasitəsilə beynəlxalq axtarışa verilib.
2009-cu il aprelin 30-da Azərbaycan Dövlət Neft Akademiyasında Fərda Qədirov 12 nəfəri öldürüb, 13 nəfəri isə yaralayıb.
Cinayət işi üzrə həbs edilmiş Əmirov Cavidan Fərman oğluna Cinayət Məcəlləsinin 214.2.1, 214.2.3 (terrorçuluq), 28,120.2.1 (qəsdən adam öldürməyə hazırlıq), 120.2.1, 120.2.3, 120.2.4, 120.2.5, 120.2.7, 120.2.10, 120.2.11, 120.2.12 (ağırlaşdırıcı hallarda qəsdən adamöldürmə), 29,120.2.1, 29,120.2.3, 29,120.2.4, 29,120.2.5, 29,120.2.7, 29,120.2.10, 29,120.2.11, 29,120.2.12 (ağırlaşdırıcı hallarda qəsdən adam öldürməyə cəhd), 206.4 (mütəşəkkil dəstə tərəfindən qaçaqmalçılıq), 228.2.2, 228.3 (qanunsuz olaraq odlu silah, döyüş sursatı əldəetmə, saxlama, daşıma və gəzdirmə) və 234.1-cü (qanunsuz olaraq narkotik vasitələri əldəetmə, saxlama və daşıma), Əliyev Nadir Şirxan oğluna və Süleymanov Nəcəf Novruz oğluna Cinayət Məcəlləsinin 214.2.1, 214.2.3, 120.2.1, 120.2.3, 120.2.4, 120.2.5, 120.2.7, 120.2.11, 120.2.12, 29,120.2.1, 29,120.2.3, 29,120.2.4, 29,120.2.5, 29,120.2.7, 29,120.2.11, 29,120.2.12, 206.4 və 228.3-cü, Qabulov Ariz Zahid oğluna Cinayət Məcəlləsinin 206.3.2 və 228.2.1-ci maddələri ilə ittiham elan olunub.
Fərda Qədirovun ölümü ilə əlaqədar cinayət işinin onun barəsində olan hissəsinə xitam verilib.